"Rusiya hazırda Azərbaycanla əməkdaşlığı artırmaqda olduqca maraqlıdır".

Bu sözləri Axar.az-a açıqlamasında politoloq Fərhad Mehdiyev prezidentlərin Paris görüşünün ardından Rusiyada baş tutacaq növbəti görüşü şərh edərkən deyib.

Politoloqun sözlərinə görə, nəinki Paris görüşü, bundan sonra Rusiyada baş tutacaq növbəti görüşdə belə hər hansı bir irəliyəliş gözlənilmir:

"Bir supergüc olan Rusiya siyasi prioritetlərini sıx-sıx və asanlıqla dəyişmir. Hətta təzyiq altında qaldıqda belə bunu edən deyil. Odur ki, Cənubi Qafqazda onun prioritetləri arasında Ermənistanı Azərbaycanın ayağına vermək kimi bir siyasəti yoxdur və bu siyasətinə Rusiya 200 ildən çoxdur davam edir. Bu səbəblə də Rusiyanın gizli pərdələr arxasında bizim xeyrimizə nəyinsə düşünüldüyünə aldanmaq lazım deyil. Ordakı bütün oyun Azərbaycan və Ermənistanı öz təsirində saxlamaq, hər iki ölkəni özünə bağlamaq və onlardan maksimum dərəcə istifadə etməkdir. Bu isə öz növbəsində onu deməyə əsas verir ki, nəinki Paris görüşü, bundan sonra Rusiyada baş tutacaq növbəti görüşdə də Azərbaycanın xeyrinə hər hansı bir irəliləyiş gözləmək lazım deyil. Sözügedən görüşlər elə görüş olaraq da qalacaq".