Ermənistan Xarici İşlər Nazirliyinin Elmar Məmmədyarovun müsahibəsində yer alan fikirlərə münasibəti rəsmi İrəvanın ənənəvi açıqlamalarından yalnız daha diplomatik bir dildə ifadə olunması ilə fərqlənir.

Bu sözləri Axar.az-a Ermənistan Xarici İşlər Nazirliyinin Azərbaycan Respublikasının XİN rəhbəri Elmar Məmmədyarovun Dağlıq Qarabağ münaqişəsi ilə bağlı çıxışına münasibətini şərh edən analitik Elçin Mirzəbəyli deyib. O bildirib ki, Ermənistan XİN-in açıqlamasında nəzərə çarpan bəzi məqamlar var:

“Əsas məqamlardan biri də rəsmi İrəvanın danışıqlar prosesinin gedişi və bizə bəlli olmayan hansısa razılaşmaların hələlik gizli saxlanılmasında daha çox maraqlı olduğunu göstərməsidir. Ermənistan XİN-in açıqlamasında yer alan “öhdəlikləri qorumaq istəyi varsa” sözləri də ortalıqda hansısa razılaşmaların olduğunu və rəsmi İrəvanın hələlik bu barədə Ermənistan ictimaiyyətinə məlumat vermək istəmədiyini göstərir. Yerdə qalan bütün digər məsələlər isə təfərrüatdır”.

Analitik vurğulayıb ki, açıqlamada yalnız Dağlıq Qarabağın təhlükəsizliyi və statusundan söhbət açılır:

“Diqqət yetirsəniz, “müstəqillik” və digər bu kimi absurd mülahizələrdən söhbət açılmır. Bu baxımdan, açıqlamanın ən azı inkarçı və aqressiv olmadığını söyləmək mümkündür. Çox güman ki, 2019-cu ildə danışıqlar prosesində müəyyən irəliləyişlər baş verəcək”.

Qeyd edək ki, E.Məmmədyarov ötən gün verdiyi müsahibədə münaqişənin Azərbaycanın beynəlxalq tanınmış sərhədləri çərçivəsində ərazi bütövlüyü və suverenliyi əsasında həll olunmağının vacibliyini bildirib. Buna cavab olaraq Ermənistan XİN bəyanat verib.