"Hərbi rejim və maraqların girovuna çevrilən bir ölkədən və onun əhalisindən hansı sülhü gözləmək olar?"

Bu sözləri Axar.az–a açıqlamasında Azərbaycan Demokratik İslahatlar Partiyasının sədri, millət vəkili Asim Mollazadə hazırki dönəmdə Böyük Sülh sazişinin reallığı məsələsinə aydınlıq gətirərəkən deyib.

Millət vəkilinin sözlərinə görə, Ermənistan bu gün müstəqilliyini itirmiş və müəyyən qrupların əlində hərbi forposta çevrilən bir ərazidən başqa heç nə deyil:

"Bu gün beynəlxalq ictimaiyyət, dünyanın nüfuzlu ölkələri Cənubi Qafqazda sülh əldə etmək istəyirlərsə, hüququn aliliyinə arxalanaraq Ermənistanı sülhə məcbur etməkdə müvafiq addımlar atmalıdırlar. İlk növbədə sanksiyalar tətbiq olunmalı və ərazilərimizin boşaldılması üzrə şərt qoyulmalıdır. BMT–nin və Təhlükəsizlik Şurasının (TŞ) qətnamələri tələb olunmayanadək biz sülh əldə də bilməyəcəyik. Çünki Ermənistan hansısa müstəqil qərarları qəbul etmək imkanına və gücünə malik olan müstəqil bir dövlət deyil. Bu gün ölkə və orada yaşayan əhali hərbi rejim və maraqların girovuna çevrilib. Nə qədər ki, İrəvana ciddi və sərt təzyiqlər edilməyib, hansısa bir sazişin reallaşacağını gözləmirəm".