"Ciddi, ziddiyyətli, uzunmüddətli konfliktləri bir görüşlə həll etmək və buna ümid bəsləmək yanlış istiqamət olar".

Bu sözləri Axar.az-a açıqlamasında politoloq Rasim Ağayev Paris görüşünün ardından Azərbaycan və Ermənistan Xarici İşlər nazirlərinin İsveçdə növbəti görüşünü şərh edərkən deyib.

Onun sözlərinə görə, nazirlərin bu görüşü Paris müzakirəsinin heç də nəticəsiz olmadığını göstərir:

"Məsələnin həlli vaxt və səbir tələb edir. Bu nöqteyi-nəzərdən rəsmilərin görüşü onu göstərir ki, Paris danışıqlarının müsbət nəticəsi var. Yəni Fransada konfliktlə bağlı müəyyən razılıqlar əldə olunmasa da, danışıqlar barəsində razılaşma var. Bu da hədə-qorxu, ziddiyyət, ritorikanı bir kənara qoyub məsələnin həlli anlamına gəlir. Yəni soyuq başla belə qızğın konfliktiləri daha asan həll etmək olar, nəinki qızğın başla. Vasitəçilər razılığın əldə olunması üçün pozitiv atmosfer yaratmağa çalışırlar. Bunun üçün isə intensiv görüşlərin olması olduqca vacibdir. Danışıqlar prosesi istənilən halda dayandırıla bilməz. Paris görüşünün ardınca Elmar Məmmədyarovla Nalbadyanın İsveçdə baş tutacaq görüşü də məhz bu məqsədi daşıyır. Konkret konfliktlə bağlı müzakirələr aparılacaq. Heç bir görüş heç vaxt nəticəsiz qalmır. Hər zaman hansısa nəticə olur. Hətta Parisdə qırğın belə olsaydı, bu da bir nəticə olacaqdı ki, tərəflər məsələni həll etməyi bacarmır. Ona görə də nəticə həmişə olur, ancaq bizim istədiyimiz nəticə yoxdur. Bu isə uzun vaxt tələb edir. 20 illik müharibənin ardından məsələnin bir görüşdəcə həllinə ümid bəsləmək yanlış istiqamət olar".