Rusiya Köçəryana görə Paşinyanla müharibə aparmayacaq.

Bu sözləri Axar.az-a Ermənistanın sabiq prezidenti, Xocalı qətliamının müəlliflərindən olan Robert Köçəryanın həbsdə saxlanılması ilə bağlı bəzi suallara cavabında politoloq İlqar Vəlizadə deyib.

“Düzdür, Köçəryanla Putin arasında yaxın münasibətlər var, ancaq Rusiya ona görə Paşinyanla müharibə aparmayacaq. Əslində, Köçəryan da bunu yaxşı anlayır. Paşinyan Köçəryanla münasibətlərdə başqa xətt tutsaydı, əlbəttə ki, nəticələr fərqli ola bilərdi. Ancaq Moskvanın burada daha böyük siyasi maraqları var. Baxın, Köçəryanın saxlanılmasından sonra Paşinyan Moskvaya getdi və orada Putinlə danışıqlar apardı. Ancaq danışıqlar heç bir nəticə vermədi və Rusiya Ermənistana satdığı qazın qiymətini qaldırdı. Bu, dolayısı ilə Paşinyana bir təzyiq idi. Rusiya ümumiyyətlə Ermənistanın indiki hakimiyyətindən narazı olduğunu göstərir və bu yöndə müəyyən mesajlar verir. Bu, uzunmüddətli bir siyasətdir və Moskvanın addımlarını hissə-hissə atacağını düşünürəm. Bunu yaxşı başa düşən Paşinyanın əks addımlar üçün müəyyən qədər vaxtı var. Bu əks addımların nədən ibarət olacağını və prinsip etibarilə Rusiya-Ermənistan münasibətlərinı təsirini önümüzdəki aylarda görəcəyik”, - politoloq bildirib.

Ekspertin sözlərinə görə, Moskva İrəvana satdığı qazın qiymətini qaldırmaqla kifayətlənməyəcək, Paşinyana təzyiqlərini davam etdirəcək:

“Bildiyiniz kimi, Ermənistan Avrasiya İttifaqına sədrlik edəcək. Sədr ölkə isə adətən öz xeyrinə müəyyən təşəbbüslər irəli sürür. Hesab edirəm ki, Rusiya qaz məsələsindən sonra ikinci addım kimi Ermənistanın Avrasiya İttifaqındakı bu rolunu bloklaya bilər. Necə ki, Rusiya və Qazaxıstan Ermənistanın KTMT-də baş katib vəzifəsinə namizədliyini əlindən aldı. Çox güman ki, Rusiyanın bu addımları davamlı olacaq”.

Qarabağ məsələsinə gəlincə, politoloq Rusiyanın hələ ki birmənalı olaraq Ermənistandan güzəştlər tələb edəcəyini düşünmür:

“Ancaq bütün hallarda Rusiya danışıqlarda Ermənistana 5 rayonun Azərbaycana verilməsi qarşılığında kommunikasiyaların açılması ilə bağlı təklifini açıq şəkildə səsləndirəcək”.