Türkiyə sərhədləri boyunca Suriya ərazilərini nəzarətə götürməklə təhlükəsizlik zolağı yaratmaqda əvvəlki kimi maraqlıdır.

Bu sözləri Axar.az-a açıqlamasında beynəlxalq əlaqələr üzrə ekspert Elşən Mustafayev deyib. O bildirib ki, bu məsələyə ilk vaxtlar Rusiya etiraz etsə də, artıq razılaşıb və hətta hərbi əməliyyatları da koordinasiya ediblər:

“Bundan sonra Əsədin məsələnin üstünə ciddi getməməsi də onu göstərir ki, hələlik bu proses onun da marağındadır. Türkiyə “Fərat qalxanı” və “Zeytun budağı” əməliyyatından sonra növbəti hədəflərini açıqlayaraq sırada Menbiç olduğunu bildirmişdi. Amma məsələ ondadır ki, Fərat çayının şərqində 600 km-dək sərhəd boyu ərazilərə nəzarət edən PYD-PKK terror qruplaşmaları hələ də ABŞ tərəfindən dəstəklənir. Türkiyə hərbi əməliyyatları davam etdirəcəyi halda məhz PYD-PKK-nın nəzarət etdiyi əraziləri təmizləməlidir”.

Ekspert vurğulayıb ki, ABŞ buna hər vəchlə mane olmağa çalışır: “Təsadüfi deyil ki, Tramp Suriyadan çəkiləcəyi ilə bağlı verdiyi bəyanatdan sonra çəkiləcəyi ərazilərdə Əsəd rejiminə müxalifətdə olan silahlı qrupların təhlükəsizliyinə Türkiyədən qarant istəmişdi. Əslində həmin qarant Ankaranın terror təşkilatları kimi tanıdığı təşkilatlar üçün nəzərdə tutulub ki, Türkiyə bu qarantı heç vaxt verməyəcək. Bu isə o deməkdir ki, ABŞ hərbiçilərinin həmin ərazilərdən çəkilməsi tezliklə baş verməyəcək. Hazırda Türkiyə və ABŞ-ın regionda maraqlarının toqquşduğu əsas faktor budur. Amma düşünmürəm ki, bu fikir ayrılığı hansısa ciddi qarşıdurmalara gətirib çıxaracaq. Son vaxtlar aparılan siyasət göstərir ki, Vaşinqton Türkiyə ilə münasibətlərində istiliyin yaranmasında maraqlıdır. Məhz bu səbəbdən hazırda razılığa gəlinə bilməyən məqamlarda ortaq nöqtələr tapılmasına cəhdlər edilir. Digər tərəfdən, ABŞ-ın regiondakı marağının qorunub saxlanması üçün alternativ yollar da var. PY/PKK-nın Əsəd rejiminə qarşı müxalif güclər kimi daim dəstəklənəcəyi də inadırıcı görünmür”.