Qarabağ klanı Azərbaycan və Ermənistan rəhbərlərinin son görüşünü öz məqsədləri üçün istifadə etməyə çalışır.

Axar.az xəbər verir ki, bu sözləri Azərbaycan Prezidenti İlham Əliyevlə Ermənistan Baş naziri Nikol Paşinyan arasında Davosda baş tutan görüşü şərh edən politoloq Elxan Şahinoğlu deyib.

“Qarabağ klanı ermənilər arasında şübhə toxumu səpməyə çalışır ki, guya Paşinyan “təslimçi sülhə” hazırlaşır. Halbuki Paşinyan Qarabağ münaqişəsinin həllində bircə addım da atmağa hazır deyil və Davosda da heç bir razılaşma qeydə alınmayıb. Buna baxmayaraq, Qarabağ klanı Paşinyanın mövqelərini zəiflətmək üçün bütün fürsətlərdən istifadə edir və edəcək. Qarabağ klanı onların hakimiyyətdəki dövründən fərqli olaraq, Nikol Paşinyanın hakimiyyəti dövründə cəbhə bölgəsində atəşkəsə riayət olunmasından və gərginliyin olmamasından da şübhələnir. Yəni demək istəyirlər ki, Azərbaycan hakimiyyətinin Paşinyana münasibəti eks-prezidentlər Serj Sərkisyana və Robert Köçəryana münasibətdən fərqlənir”, - siyasi şərhçi bildirib.

Qeyd edək ki, Davos İqtisadi Forumu çərçivəsində Azərbaycan Prezidenti İlham Əliyevlə Ermənistanın Baş naziri Nikol Paşinyan arasında qeyri-rəsmi görüş keçirilib. Görüş 1,5 saat davam edib. Görüşdən sonra Qarabağ klanının üzvləri Ermənistan Baş naziri Nikol Paşinyana qarşı kampaniyaya başlayıblar.