"Hamı deputat olmaq istəyir. Ancaq elələri var ki, heç yaşadığı ərazidən bələdiyyə üzvlüyünə namizəd olmayıblar. Hələ bir bələdiyyə üzvü seçilin və bundan sonra böyük iddialara düşün!"

Bu sözləri Axar.az-a açıqlamasında BAXCP sədrinin müavini Niyaməddin Orduxanlı bələdiyyə seçkilərində növbəti - 4-cü dəfə iştirak etmək barədə qərarını açıqlayarkən deyib. Onun sözlərinə görə, artıq lazım olan sənədləri 45 saylı Dairə Seçki Komissiyasına təqdim edib:

"Bu günə qədər 3 dəfə bələdiyyə seçkilərində iştirak etmişəm və hər üçündə qalib gəlmişəm. İlk dəfə namizədliyimi verəndə 21 yaşım vardı, ən gənc bələdiyyə üzvlərindən biri olmuşam".

BAXCP sədrinin müavini onu da bildirib ki, ölkədə yeganə partiya sədrinin müavinidir ki, həm də 15 illik bələdiyyə təcrübəsi var: "Siyasətlə məşğul olan hər kəs seçkidə iştirak etməlidir. Ancaq bu gün partiyalarda təmsil olunan rəhbər şəxslər bələdiyyə seçkilərində iştirak etməkdə maraqlı görünmürlər. Niyə seçkiyə qatılmırsınız? Bunların hamısı deputat olmaq istəyir. Ancaq elələri var ki, heç yaşadığı ərazidən bələdiyyə üzvlüyünə namizəd olmayıb. Hələ bir bələdiyyə üzvü seçilin və bundan sonra böyük iddalara düşün".