Suriyada hər kəsin öz marağı var. Bu maraqlara ərazi maraqları da daxildir. Onlar Suriyadakı hərbi vəziyyətə birlikdə nəzarət edəcəklər.

Bu sözləri Axar.az-a açıqlamasında Suriya ilə bağlı fevralın 14-də Soçi şəhərində keçiriləcək Türkiyə-İran-Rusiya üçtərəfli sammiti barədə danışarkən Xəzər-Avrasiya Mərkəzinin rəhbəri, rusiyalı politoloq Andrey Sızranov deyib. Onun sözlərinə görə, tərəflər artıq çoxdandır Suriyanın təsir dairələrinə bölünməsi ilə bağlı danışıqlar aparır.

“Hərçənd, amerikalıların çıxması prosesi hələ uzun müddət gedəcək və onlar mütləq İraqda qalacaqlar. Oradan isə Suriyaya müdaxilə edəcəklər”, - ekspert bildirib.

Ekspertin fikrincə, İran müharibədən sonrakı Suriyada təsirinə görə lider olmağa ümid edir, Türkiyə şimal ərazilərinə, Rusiya isə Aralıq dənizi sahillərinə nəzarət etmək niyyətindədir.

Politoloqun sözlərinə görə, Soçi sammiti çərçivəsində liderlərin ikitərəfli görüşlər keçirməsi ehtimalı yüksəkdir:

“Rusiya və Türkiyə rəhbərləri ikitərəfli görüşəcəklər. Birgə iqtisadi layihələrin müzakirəsi mümkündür. Putin və Ərdoğan Suriya iqtisadiyyatının bərpası üçün yardım və hər bir ölkənin bu mövzuda iştirak dərəcəsini müzakirə edəcəklər”.