Ana səhifə Gündəm |
14:38
Fevralın 14-də Rusiyanın paytaxtı Moskva şəhərində yerləşən "Neolit" restoranında azərbaycanlılarla çeçenlər arasında yaranmış qalmaqaldan sonra məsələyə hər iki tərəfin nümayəndələri birgə münasibət bildirib.
Axar.az Bakı.vs-ə istinadən xəbər verir ki, Moskvada toplaşan hər iki icma nümayəndələri azərbaycanlılarla çeçenlər arasında heç bir ədavətin olmadığını bəyan ediblər.
Çeçenlərin nümayəndəsi törədilən hadisələri təxribat adlandırıb və hər iki tərəfi bu təxribata uymamağa çağırıb.
“Moskvada minlərlə çeçen və azərbaycanlı dostluq edir. Onlar birlikdə işləyirlər, bir-birilərinə etibar edirlər. Azərbaycanlılarla çeçenlər yaxın qardaş kimi birləşiblər. Bütün azərbaycanlılara bildirmək istəyirəm ki, onlar narahat olmasınlar. Ola bilər ki, aramızda hansısa anlaşılmazlıq və problem olub. Həmin problemi hansısa kompüter arxasında oturan dələduz götürüb paylaşıb və həmin hadisəni şişirdib. Bununla da həmin şəxslər təxribat yaratmaq istəyirlər.
İstəyirəm bildirim ki, biz dostuq, çeçen və azərbaycanlılar qardaşdırlar. Heç kəs bizim azərbaycanlı qardaşlarımızı təhqir edə bilməz və buna haqları yoxdur. Heç kim də heç vaxt bu əmələ haqq qazandırmır.
Həmçinin həmin insidentdə iştirak edən azərbaycanlılara səslənmək istəyirəm. Hansısa çeçeni videoya çəkib yaymaq provokasiya yaratmaqdır.
Biz hər gün görüşürük, çörək yeyirik. Buna hörmət etməliyik. Arada yaranmış şəxsi münasibətlərə görə azərbaycanlılarla çeçenlər arasında qalmaqal yaratmaq olmaz. Şəxsi problemləri aranızda həll edin.
Bütün çeçenlər azərbaycanlıları təhqir edən həmin şəxsi və həmin çeçenin videosunu yayan şəxsi qınayır”, - deyə həmin şəxs bildirib.
Bununla bərabər, bəzi azərbaycanlılar da öz Feysbuk səhifələrində çeçenlərlə birgə video müraciətlər yayımlayıblar.
Videomüraciətlərdən birini Əbu Bətul Hüseyni adlı azərbaycanlı Feysbuk istifadəçisi öz səhifəsində yerləşdirib. Videoda yer alanlardan ikisinin azərbaycanlı, birinin çeçen olduğu bildirilib.
“Bütün qardaşlara və müsəlmanlara salam olsun. Biz hamımız - çeçenlər də, azərbaycanlılar da və digər millətlər də qardaşıq. Bizim üçün millət fərqi yoxdur, biz hamımız müsəlmanıq. Heç bir şeytana imkan verməyəcəyik ki, aramızda konflikt yaratsın”, - müraciətdə qeyd olunub.
***
Azərbaycanlılarla çeçenlərin bir yerdə verdikləri açıqlamanı Moskvada yaşayan tanınmış jurnalist Fuad Abbasovun təqdimatında təqdim edirik:
Tarix
2019.02.16 / 18:37
|
Müəllif
İlkin Həsənov
|