Azərbaycan və Ermənistan XİN rəhbərlərinin təkrar-təkrar görüşməsinə ehtiyac yoxdur.

Bu sözləri Axar.az-a açıqlamasında analitik Elçin Mirzəbəyli deyib. O bildirib ki, görüş Ermənistanın mövqeyində hər hansı dəyişiklik olduğu zaman baş tuta bilər:

“Ancaq Münhen konfransı öncəsi Ermənistan tərəfinin verdiyi açıqlamalar, bəyanatlar sübuta yetirdi ki, indiki şəraitdə təmasın davam etdirilməsi üçün hər hansı əsas yaranmayıb. Əsas olmadığı təqdirdə isə şübhəsiz ki, danışıqlar masası arxasına oturmağın hər hansı mənası yoxdur. Daha öncə də Azərbaycan prezidenti və Ermənistan baş nazirinin Davosda 1 saat yarım davam edən qeyri-rəsmi görüşü böyük rezonans doğurmuşdu. Paşinyanın əleyhdarları bu hadisədən sonra ona qarşı sərt mövqedən çıxış etməyə başladı. Ola bilsin ki, Ermənistan Xarici İşlər Nazirliyinin belə bir görüşə cəhd etməməsinin səbəblərindən biri də Ermənistanın daxilində onların əleyhinə olacaq növbəti kampaniyaya rəvac verməmə ehtimalından qaynaqlanır”.

E.Mirzəbəyli vurğulayıb ki, Azərbaycanın Ermənistan tərəfi ilə hazırda görüşməsinə ehtiyac yoxdur:

“Həmsədrlər Bakıya gələndən sonra Ermənistanın mövqeyinin nədən ibarət olması, danışıqlar prosesinin davam etdirilməsinə əsas olub-olmaması, yeni hər hansı formada mövqe dəyişikliyinin baş verib-vermədiyi aydın olacaq. Düşünürəm ki, əgər yeni bir məsələ ortaya çıxacaqsa, Ermənistanın mövqeyində dəyişiklik əmələ gələcəksə, danışıqların ən azı intensivləşməsi üçün zəmin olacaqsa, o zaman həmsədrlərin Bakıya səfərindən sonra bu və ya digər şəkildə görüşlərin baş tutmasının şahidi ola bilərik. Əks təqdirdə ölkəmiz danışıqlarda vaxt itirməsinə ehtiyac olmadığını göstərəcək”.