Bir neçə gün öncə azərbaycanlı sərhədçilərin Keşikçidağ monastrına gedən yolu bağlaması sərhədlərin delimitasiyası məsələsini yenidən gündəmə gətirib.

Gürcüstan Prezidenti Salome Zurabişvili bildirib ki, Azərbaycanla Gürcüstan arasında ümumi sərhədlər üzrə razılıq əldə edilməsi iki ölkə arasında dostluq münasibətlərini gücləndirəcək və mövcud olan problemləri aradan qaldıracaq. Gürcüstanın daxili işlər naziri və bir neçə başqa dövlət rəsmiləri isə Keşikçidağ məbədinin gürcülərə məxsus olduğunu iddia edərək delimitasiya zamanı Azərbaycanın güzəşt etməsini istəyir.

Məsələ ilə bağlı millət vəkili Qənirə Paşayeva Real TV-yə müsahibə verib. Millət vəkilinin fikrinə görə, üzərində qədim tarixi mirasımız olan torpaqlarımız dəyərlidir və Gürcüstan bu məsələdə xətalı mövqe tutur. Yürüdülən kampaniya durdurulmazsa, bu məsələdən başqa mənalar çıxacaq. Bu iki ölkə arasında münasibətlərdə soyuqluq yarada bilər ki, bu da ilk növbədə Gürcüstan üçün zərərli ola bilər. Bu yanaşmalarda çox ehtiyatlı olmaq lazımdır.

“Keşikçidağla bağlı Gürcüstanın torpaq iddiaları ağrılıdır. Alban məbədlərinə gürcülərin iddiası bizim üçün ağrılı məsələdir. Bu bizim tariximizin bir parçasıdır və Azərbaycan təbii ki, Qafqaz Albaniyası tarixinə, Alban məbədlərinə, bizim o dövrün tarixi abidələrinə ciddi şəkildə sahiblənir.

Bu məsələnin heç bir tarixi əsası yoxdur və yolverilməzdir. Mən düşünürəm ki, bizim alimlərimiz, tarixçilərimiz dəyirmi masa keçirməlidirlər və faktlarla cavablar verilməlidir. Çünki bu yanaşmanın nə tarixi, nə də bu günə dayalı əsası var. Məsələnin daha çox siyasi məsələ olmasına gəlincə, hansı abidələrin kimlərinsə nəzarətinə keçməsindən söhbət gedirsə, gürcülər düşünməlidir. Biz də Gürcüstan ərazisindəki bir çox abidələrimizə iddia qaldıra bilərik. Lakin biz bu məsələlərə beynəlxalq səviyyədə tanınmış sərhədlər çərçivəsində yanaşmalıyıq".