"Sevil massivi" MTK-dan mülk alanların yalnız 300 nəfərinə dəymiş ziyan ödənilib.

Axar.az-a verilən məlumata görə, qalan 2700 payçı hələ də dəyən ziyanı geri qaytara bilməyib. Vətəndaşlara aldıqları həyətyanı sahə, evə görə dəymiş kompensasiya ödənilmir. Payçılar aylardır yaranmış qeyri-müəyyən vəziyyətə nə zaman son qoyulacağını gözləyirlər.

Zərərçəkənlərin sözlərinə görə, zərəri ödənənlər əsasən yaşayış binasından ev almaq üçün ödəniş edənlərdir.

İkiqat zərər çəkənlər isə MTK-dan torpaq sahəsi alıb öz hesablarına fərdi yaşayış evi tikənlərdir. Onlara deyilib ki, tikdikləri evlərin məbləği müəyyən ediləndən sonra pul ödəniləcək. Ancaq bu zərərin hesablanması yekunlaşmayıb.

Hazırda evlərin qiymətləndirilməsi üçün Korrupsiyaya Qarşı Mübarizə Baş İdarəsi tərəfindən qrup yaradılıb. Qrup vətəndaşlara ödəniləcək məbləği müəyyən etdikdən sonra Abşeron Rayon İcra Hakimiyyəti (RİH) tərəfindən zərərçəkmişlərin vəsaiti geri qaytarılacaq.

Xatırladaq ki, hazırda "Sevil massivi" MTK-da tikinti və satış işləri dayandırılıb. Eyni zamanda, cinayətin digər iştirakçılarının müəyyənləşdirilməklə istintaqa cəlb olunmaları istiqamətində zəruri istintaq-əməliyyat tədbirləri Baş Prokuror yanında Korrupsiyaya Qarşı Mübarizə Baş İdarəsi tərəfindən davam etdirilir.