"Gürcüstanın əsas idarəsi Bidzina İvanişvili və onun strateji postlara yerləşdirdiyi komandasının əlindədir".

Bu sözləri Axar.az-a açıqlamasında NATO Əməkdaşlıq İnstitutunun rəhbəri Fərrux Məmmədov söyləyib:

"Bu gün mövcud olan Gürcüstan siyasi hakimiyyəti ölkənin idarəçiliyində və strateji qərarların qəbulunda rol oynamır. Gürcüstan hökumətinin durumunu analiz etdiyimizdə görürük ki, baş nazir və prezident sadəcə protokol daxili işləri görürlər. Gürcüstanın əsas idarəsi Bidzina İvanişvili və onun strateji postlara yerləşdirdiyi komandasının əlindədir. Lakin artıq gürcü xalqı da gedən prosesləri görür, analiz edir və yaxın gələcəkdə baş verə biləcək təhlükələri hiss edir. Moskva İvanişvili hakimiyyətinin bu gedişlə çox da tab gətirməyəcəyini bilərək mümkün formada tezliklə əlaqələrin bərpasına və tərəfdaşlıq münasibətlərini yüksək bir siyasi müstəviyə daşımaq istəyir. Rusiya üçün Gürcüstan Cənubi Qafqazın böyük koridorudur. Bu koridoru itirmək Rusiya üçün qəbulolunmazdır. Buna görə də bu gün bütün danışıqlar və əlaqələr bu müstəvidə aparılır. Düşünürəm ki, əgər Bakı Gürcüstanı siyasi olaraq basqı altında tutarsa, o zaman Tiflis Azərbaycanın icazəsi olmadan hər hansı strateji sənədə imza ata bilməz. Çünki Gürcüstanın imza atacağı strateji sənədlərdə Azərbaycanın təhlükəsizliyi ilə bağlı məsələlər də mövcuddur. Rəsmi Bakı bundan istifadə edərək artıq regionda siyasi proseslərin idarəçiliyini birbaşa öz əlinə ala bilər".