Mətbuat Şurasının sədri, millət vəkili Əflatun Amaşov tanınmış jurnalist Fuad Abbasovun mayın 16-da Moskvada hüquq-mühafizə orqanlarının əməkdaşları tərəfindən saxlanılmasına münasibət bildirib.

Axar.az xəbər verir ki, onun mayın 28-də Azərbaycana deportasiya olunmasının gözlənildiyini qeyd edən Amaşov F.Abbasovun miqrasiya qanunvericiliyini pozmaqda təqsirli bilindiyini xatırladıb.

“Fuad Abbasov tanınmış jurnalistdir. Özünün mövqeyində hər zaman ardıcıllığı ilə fərqlənir. Azərbaycan həqiqətlərinin Rusiya ictimaiyyətinə çatdırılmasında yaxından iştirak edir. Xüsusən də jurnalist kimi Dağlıq Qarabağ məsələsində Azərbaycanın ədalətli mövqeyini qətiyyətlə dəstəkləyir. Belə bir adamın bu cür vəziyyətlə üzləşməsi bizi ciddi şəkildə narahat etməkdədir”, - millət vəkili qeyd edib.

MŞ sədri bildirib ki, F.Abbasovun vəkili Elman Paşayevlə mütəmadi əlaqə saxlayır:

“Vəkilin bildirdiyinə görə, jurnalistə qarşı fiziki təzyiq də göstərilib. Görünür, jurnalistlə bağlı müəyyən maraqlı qüvvələr var. Bu hal da narahatlıq və təəssüf doğurur. Ümumən durumu Rusiyanın jurnalist təşkilatları ilə də daim müzakirə edirik. Baxmayaraq ki, F.Abbasovun deportasiyası barədə qərar verilib, inanırıq ki, yekunda məsələ ədalətli həllini tapacaqdır”.