Ana səhifə Gündəm |
Avroliqanın finalının Bakıda keçirilməsinə “Amnesti İnterneşnl” qeyri-hökumət təşkilatı yox, UEFA qərar verib.
Bu sözləri Axar.az-a açıqlamasında millət vəkili Aydın Mirzəzadə “Amnesti İnterneşnl” təşkilatının Avropa Liqasının finalının Bakıda keçirilməsini tənqid etməsinə münasibət bildirərkən deyib.
O, finala ölkəmizin ev sahibliyi etməsinin təsadüfi olmadığını söyləyib:
“Azərbaycan ev sahibi olmaq haqqını iki namizəd ölkə arasında gərgin mübarizədə qazanıb. UEFA Azərbaycanın paytaxtını final yarışı keçirilən bir yer kimi seçərkən bütün məsələləri, o cümlədən insan hüquqlarının vəziyyətini, bura gələcək insanların təhlükəsizliyinin qorunmasını, futbol yarışının bir bayrama çevriləcəyi proqnozunu nəzərə alıb. Aydın görünür ki, son dövrlərdə Azərbaycan seçiminə Avropada bəzi dairələr çox böyük qısqanclıqla yanaşırlar, çox absurd bəhanələr gətirərək, bu yarışa kölgə salmağa çalışırlar. Ancaq biletlərin çox hissəsi satılıb. Azərbaycan bu yarışı yüksək səviyyədə keçirməyə hazırdır. Avroliqanın Azərbaycanda keçiriləcək finalı futbol tarixində çox möhtəşəm oyunlardan biri olacaq.
Bəzi dairələrin xaricdə müəyyən rıçaqlar vasitəsilə həm yarışın keçirilməsinə mane olmaq, həm də Azərbaycan haqqında mənfi fikir yaratmaq cəhdləri boşa çıxacaq. Çünki onların gətirdiyi bəhanələrin heç bir əsası yoxdur”.
Qeyd edək ki, korrupsiyada adı hallanan “Amnesti İnterneşnl” təşkilatı Azərbaycanda Avropa Liqasının finalının keçirilməsini pisləyib.
Tarix
2019.05.23 / 11:41
|
Müəllif
Büllurə Yunus
|