Ana səhifə Gündəm |
ATƏT-in Minsk Qrupunun həmsədrlərinin regiona səfəri ərəfəsində mayor Aqil Ömərovun qətlə yetirilməsi, həmçinin dünən XİN rəhbərlərinin görüşü ərəfəsində daha bir təxribat törədilməsi bir daha sübut edir ki, Ermənistan atəşkəs rejiminin qorunub saxlanmasını, sülh danışıqlarının konstruktiv məcrada davam etməsini istəmir.
Bu sözləri millət vəkili Musa Quliyev Axar.az-a açıqlamasında deyib. O bildirib ki, Müdafiə Nazirliyi şəhid əsgərimizin qisasını almalıdır:
“Ermənistanın Baş naziri Nikol Paşinyanın Sankt-Peterburqda forum zamanı işğalçı ölkənin rəhbərliyinin cəbhə xəttindəki təxribatlara hər hansı aidiyyətinin olmasını təkzib etməsi ilə Ermənistanın Müdafiə naziri David Tonoyanın açıqlamasının üst-üstə düşməməsi Nikolun öz ölkəsində nüfuzunun nə dərəcədə aşağı olduğunu göstərir. Ümumiyyətlə, düşmən tərəfi son günlər belə təxribatlar yaradaraq Azərbaycan tərəfinin səbrini sınayır. Onların bu sərsəm və işğalçı davranışlarına mütləq ağır formada cavab verilməlidir. Azərbaycan Ordusu onlara öz yerlərin qısa zamanda göstərməlidir. Azərbaycan düşmənə sübut etməlidir ki, biz əsgərimizin qanını yerdə qoymayacağıq. Bizim buna qüdrətimiz və hərbi gücümüz kifayət edər. Həmçinin hesab edirəm ki, biz onlara lazımı cavabı verməsək, belə hallar tez-tez yaşanacaq”.
Qeyd edək ki, iyunun 9-da cəbhənin Tərtər rayonu istiqamətində düşmən tərəfindən açılan atəş nəticəsində Azərbaycan Ordusunun hərbi qulluqçusu Xəlilov Elşən Vüqar oğlu şəhid olub.
Tarix
2019.06.10 / 18:04
|
Müəllif
Mahir Ələkbərov
|