İspaniyanın İbiza kurortunda 22 yaşlı Azərbaycan vətəndaşının təxminən 1 milyon funt sterlinq dəyərində saatının oğurlanma xəbəri olduqca maraqla qarşılanıb. Saatın sahibi ilə bağlı məlumatlar, eləcə də onun qiyməti sosial şəbəkələrdə geniş müzakirə mövzusuna çevrilib.

Axar.az xəbər verir ki, saatı bu qədər dəyərli edən əsas məqamlardan biri onun dünyada cəmi 75 adamda olmasıdır.

Bundan başqa, “Richard Mille” markasına aid “50-03 McLaren F1” model saatı dünyanın ən yüngül qol saatlarındandır. Qrafen, titan və karbon qarışığından hazırlanmış bu saatın ağırlığı 40 qramdır. Saatın dialı qara elektrodlu titandan ibarətdir.

Çərçivədə saat, dəqiqə, saniyəyə bölünmüş xronoqraf, 70 saatlıq güc rezervi, funksiya göstəriciləri yerləşdirilib.

Saatın kəməri qrafen kauçukdan hazırlanıb.

Cəmi 75 ədəd hazırlanan saatın qiyməti 964 min funt sterlinqdən başlayır.