Güney azərbaycanlı milli-mədəni fəallar Həkimə Əhmədi və Siyamək Mirzayinin aclıq aksiyası davam edir.

Axar.az xəbər verir ki, Binab Ədliyyə Şöbəsinə ünvanladığı məktubda qeyri-müəyyən vəziyyətdə saxlanmasına etiraz olaraq Marağa həbsxanasında aclıq aksiyasına başlayan H.Əhmədi aksiyasının 3-cü günündədir.

Evin zindanının təknəfərlik kamerasında aclıq aksiyası keçirməkdə olan digər milli-mədəni fəal Siyamək Mirzayi isə 16 gündür aksiyasına davam edir. Ailəsi fəalın səhhətindən dolayı nigarandır.

Qeyd edək ki, Həkimə Əhmədi 9 ay öncə saxlanılaraq Marağa həbsxanasına köçürülüb. İki uşaq anası olan H.Əhmədinin sosiologiya üzrə ali təhsili var. O, Mərənd şəhərinin fəallarından biri kimi ana dilində təhsil hüququ tələbi ilə əlaqədar fəaliyyət göstərir.

Siyamək Mirzayi isə 2016-cı il iyunun 24-də Ərdəbilə yaxın Parsabad şəhərində saxlanılıb. Fəal öncə Tehran məhkəməsi tərəfindən ölkənin milli təhlükəsizliyinə qarşı çıxmaq və qanunsuz qrup yaratmaq kimi ittihamlarla 10 il həbs və 2 il Təbəs şəhərinə sürgünə məhkum edilib. Sonra Apellyasiya Məhkəməsi fəalın işinə yenidən baxaraq Mirzayiyə 3 il həbs və 1 il sürgün cəzası verib.