Azərbaycan regionun enerji sektorunun sabitliyinin təmin edilməsində iştirak edəcək, həmçinin Gürcüstan və Türkiyə ilə əməkdaşlıq edəcək.

Bunu energetika naziri Natiq Əliyev Gürcüstan və Türkiyəni birləşdirən elektrikötürücü xəttin (EÖX) açılışında deyib.

Nazirliyin yaydığı məlumata görə, N.Əliyevin başçılıq etdiyi nümayəndə heyəti dekabrın 11-də Gürcüstanda "Qara dəniz ötürücü şəbəkəsi" layihəsi çərçivəsində "Axaltsixe" elekrtrik yarımstansiyasının və yüksək gərginlikli EÖX-ün açılış mərasimində iştirak edib.

550/400/220 kilovoltluq yarımstansiya və 400 kilovoltluq elektrikötürücü xəttin açılışında iştirak etmiş nümayəndə heyətinin tərkibinə "Azərenerji" ASC-nin sədri Etibar Pirverdiyev, Azərbaycanın Gürcüstandakı səfiri Azər Hüseynov və digər rəsmi şəxslər daxildir.

Mərasimdə Gürcüstanın Baş naziri İrakli Qaribaşvili, Türkiyənin energetika və təbii ehtiyatlar naziri Taner Yıldız, Gürcüstanın energetika naziri Kaxa Kaladze, Avropa İttifaqının nümayəndələri və digər yüksək vəzifəli rəsmi şəxslər iştirak ediblər.

N.Əliyev bildirib: "Uzun illərdir ki, əməkdaşlıq edirik və bu əməkdaşlıq ildən-ilə möhkəmlənir. Biz xalqlarımızın rifahının yaxşılaşmasına yönəldilmiş və regionun iqtisadi inkişafına yardım edən bu cür əməkdaşlıqda iştirak etməyə şadıq".

Qeyd edək ki, "Qara dəniz ötürücü şəbəkəsi" layihəsi Azərbaycan-Gürcüstan-Türkiyə eneji körpüsünün yaradılması layihəsinin bir hissəsidir. Bu enerji körpüsü Azərbaycandan Gürcüstan və Türkiyəyə, sonra isə Avropaya elektrik enerjisi ixrac etməyə imkan verəcək. (Trend)