Fuad Qəhrəmanlının ailəsində baş verən hadisə indiyə qədər ictimailəşdirilməmişdisə, demək ki, ailə öz arasında həll etməyə çalışıb. Görünür, buna nail ola bilmədikləri üçün ictimailəşdiriblər. Ailə üzvləri, görünür, artıq dözmədikləri üçün belə addım atıblar. Biz də onların müdafiəsinə qalxmışıq.

Bu sözləri Axar.az-a hüquq müdafiəçisi Novella Cəfəroğlu AXCP sədrinin müavini Fuad Qəhrəmanlının qızı Selcan Yağmurun özünün və anasının atası tərəfindən şiddətə məruz qalması ilə bağlı yazdıqlarına münasibət bildirərkən deyib.

N.Cəfəroğlu bildirib ki, Fuad Qəhrəmanlının qızının yazdıqları ilə bağlı həmin an araşdırma aparıblar:

“Zümrüd Yağmur da bildirdi ki, bəli, həqiqətən belə hal var. Bu səbəbdən biz bildirdik ki, onu müdafiə edə bilərik. Bunu tək mən bildirməmişəm, əksər hüquq müdafiəçisi Selcanı və ailəsini müdafiə etməyə hazırdır. Ancaq Selcanın və anası Zümrüd Yağmurun hüquqlarının müdafiəsinə hazır olanlara nələr yazdılar sosial şəbəkələrdə, nə təhqirlər, necə nalayiq sözlər işlətdilər? İlk növbədə biz qadınıq, qadını da müdafiə edirik. Şiddətə məruz qalmış ana və qızı müdafiə edənlərə qarşı bu cəmiyyət necə təhqirlərə yol verir, görməli idiniz! Qadına, qadını müdafiə edənlərə qarşı belə tərbiyəsizlik edənlərə qarşı konkret addımlar atılmalıdır”.