"Azərbaycanla ABŞ arasındakı soyuqluq və sairə kimi diplomatik münasibətləri görmürəm".

Bu sözləri Axar.az-a açıqlamasında millət vəkili İqbal Ağazadə deyib.

O, tərəflərin həm özünün, həm də regionun maraqlarını ciddi şəkildə nəzərə aldıqlarını bildirib:

"Hesab etmirəm ki, tərəflər arasında ciddi problemlər ola bilər. Ritorikalarda sərtliklər olur, amma bu soyuqluğa dəlalət etmir. Güman edirəm ki, tərəflər həm özünün, həm də ki regionun maraqlarını ciddi şəkildə ölçüb-biçirlər və bu istiqamətdə fəaliyyətlərini davam etdirirlər. Dəhşətli problemlər olduğunu düşünmürəm".

Qeyd edək ki, ABŞ-ın yeni təyin olunmuş səfiri Robert Sekutanın yaxın günlərdə Azərbaycana gəlməsi nəzərdə tutulur.

Xatırladaq ki, ABŞ Senatı Robert Sekutanı ötən il dekabrın 16-da ABŞ-ın Azərbaycanda səfiri vəzifəsinə təsdiqləyib. O 2007-2009-cu illərdə Tokioda, 2003-2007-ci illərdə Berlində ABŞ hökumətinin iqtisadi məsələlər üzrə iştirakına nəzarət edib. Həmçinin ABŞ-ın Əfqanıstan səfirliyində Koordinasiya direktorunun iqtisadi məsələlər üzrə birinci müavini olub. Diplomat Corctaun Universitetinin məzunu, Qlobal Menecment Məktəbinin və Milli Hərbi Kollecin magistri dərəcəsinə malikdir.