"Nagahan Alçı məsələsini yenidən qaldıracağam".

Axar.az xəbər verir ki, bu açıqlama ilə millət vəkili Fazil Mustafa çıxış edib. Millət vəkili Ermənistan məsələsində ikili standartlardan çıxış edən jurnalist Nagahan Alçının Azərbaycan tərəfindən istənilməyən adam kimi tanınmasına çalışacağını bildirib:

"Türkiyə demokratik ölkədir və istənilən erməni öz azlıq haqlarını istəyə, təbliğ edə bilər. Hətta erməni əsilli Türkiyə vətəndaşı olan baş nazirin sözçüsü Mahçupyanı da müdafiə edə bilər. Qəribədir ki, Nagahan Alçı guya AKP-ni müdafiə edən siyasət yürüdür və proqram aparıcısıdır. Bütün proqramlarda iştirakına yaşıl işıq yandırılıb. Ərdoğan Ermənistan Prezidenti Sərkisyanı Çanaqqalada ildönüm tədbirinə dəvət edir. Sərkisyan isə müsahibəsində bunu "ədəbsiz təklif" adlandırır. Yaşar Okuyan adlı bir partiya lideri də Sərkisyanın Türkiyə prezidentini təhqir edən cavabını təkrarlayır. AKP tərəfdarı olan jurnalist Nagahan Alçı isə Yaşar Okuyanı irqçilikdə günahlandırır. Yəni Nagahan Alçı guya Türkiyə prezidentinin mövqeyini dəstəkləyir, ancaq iş Ermənistana gələndə isə Sərkisyanın tərbiyəsizliyinə haqq qazandırır. Həm də bunu birbaşa AKP-yə ən yaxın kanalda dilə gətirir. Əgər Azərbaycanın Türkiyədəki səfirliyi bu adamın adını siyahıdan çıxarıbsa, ən sərt şəkildə bu məsələnin üzərinə gedəcəyəm və erməni lobbisinin himayə etdiyi bu qadının ən azı Azərbaycan tərəfindən istənilməyən adam kimi tanınmasına çalışacağam".