"Separatçıların real idarə etdiyi ərazilər Ukraynanın yalnız 3 faizini təşkil edir. Rusiyanın təsiri isə bu üç faizdədir".

Bu sözləri Axar.az-a açıqlamasında ekspert Azər Qasımlı deyib.

Onun sözlərinə görə, geosiyasi oyunda Rusiya Ukraynanı Qərbə uduzub:

"Yaxın 2-3 il ərzində Rusiyada heç bir iqtisadi artım olmayacaq. Ukrayna hadisələrindən dolayı ölkə hazırda təcrid olunmuş durumdadır. İndi onun heç bir ciddi müttəfiqi yoxdur. Vaxtilə Rusiya ilə çox yaxşı münasibətdə olan Vyetnam, Kuba kimi ölkələr bu gün ABŞ və Qərblə yaxın olmağın yollarını axtarırlar. Qərb Ukrayna məsələsində çox önəmli və ciddi bir səhvə yol verdi. Söhbət ondan gedir ki, Ukrayna hadisələri başlayanda Rusiyanın Krımı işğal etmə və separatçılara dəstək ehtimalı gün kimi aydın idi. Qərb bunu çox gözəl başa düşürdü. Əfsus ki, Qərbdən Ukraynaya böyük bir dəstək verilmədi. Söhbət burada mənəvi dəstəkdən getmir. Düzdür, maliyyə dəstəyini sonradan verdilər. Ancaq önəmli olan hərbi dəstək idi. Əgər Qərb lap əvvəldən ən müasir texnikanı Ukraynaya versəydi, böyük ehtimalla bu gün Minsk danışıqları olmayacaqdı. Çünki bu savaş özlüyündə Avropanın təhlükəsizliyinə də bir zərbədir".

Ekspert Minsk danışıqlarının bir heçlə bitəcəyini vurğulayıb:

"Ən yaxşı halda hər hansı bir texniki sənəd və deklorasiya imzalana bilər. Donetsk və Luqanskın ciddi həllindən söhbət belə gedə bilməz. Böyük ehtimalla, görüşün nəticəsi olaraq Avropa və ABŞ Ukraynanı silahlandıracaq. Bu gün biz bu prosesləri çox yaxından izləyirik. Əgər sabah Azərbaycanla Rusiya arasında müəyyən problemlər yaransa, maraqlıdır, Qərb eyni mövqeni sərgiləyəcəkmi? Vaxtilə Gürcüstan-Rusiya savaşında bunu etmədilər və Ukrayna ilə bağlı da çox gecikdilər. Hesab edirəm ki, Ukrayna hadisəsi bütün dünya üçün bir dərsdir. ABŞ-ın sabiq prezidenti Reyqan vaxtilə demişdi ki, "ruslarla münasibətdə onlara bir əlində sülh quşunu uzatdığın zaman, mütləq digər əlində qılınc olmalıdır". Görünür, Qərb liderləri bunu unudublar".