"DESFA-nın neçə faizinin satılması və ümumiyyətlə, bu şirkətin səhmlərinin SOCAR-a verilməsinin razılığını Avropa Komissiyası verməlidir".

Bu sözləri Axar.az-a açıqlamasında iqtisadçı İlham Şaban söyləyib.

O, DESFA-nın səhmlərinin satılmasında Avropa Komissiyasının rəyinin mütləq olduğunu bildirib:

"Yunanıstan həmişə Avropa Birliyinin inkişaf etmiş ölkələri sırasında özünə yer edib. Təsəvvür edin ki, birdən-birə bunlar dönüb üzlərini Moskvaya tutdular. Ən maraqlı bir şey də odur ki, Avropa Birliyi Moskvayla qaz alışını sərtləşdirəndə bunlar dedilər ki, biz "Türk axını" ilə qazın alınmasının tərəfdarıyıq. Ona görə də Yunanıstanı həm Brüssel, həm də digərləri hansı addım atacağının müəyyən edilməsi mümkün olmayan ölkə kimi səciyyələndirirlər. DESFA-nın neçə faizinin satılması və ümumiyyətlə, bu şirkətin səhmlərinin SOCAR-a verilməsinin razılığını Avropa Komissiyası verməlidir. Çünki ötən ilin noyabrından Avropa Komissiyası onu icraata götürüb. Düzdür, burada kimə nə qədər pay verilməsini tərəflər özləri müəyyən edə bilərlər, amma ümumilikdə şirkətin satış işində Avropa Komissiyasının rəyi mütləqdir. İkinci bir məsələ də odur ki, Yunanıstanın seçdiyi yolun arxasınca getməsi Azərbaycanın buna marağını saxlayacaqmı? Ümumiyyətlə, sual verilməlidir ki, Azərbaycan bu cür ölkə ilə işləmək istəyirmi? Həmçinin nəzərə almaq lazımdır ki, zaman keçdikcə şərait də dəyişir".

Qeyd edək ki, dünən mətbuatda Yunanıstanın DESFA şirkətini Azərbaycana üç şərtlə satacağı haqqında məlumat yayılmışdı. Bunlar içərisində Azərbaycan qazının Yunanıstana satış qiymətlərinin aşağı salınması, eləcə də Azərbaycan qazı üçün tranzit qiymətlərinin artırılması və DESFA-nın 49% səhmlərinin satılması yer almışdı.