"Ermənistanda hazırda hakimiyyət uğrunda çox ciddi savaş başlayıb".

Bu sözləri Axar.az-a açıqlamasında BDU-nun Erməni Araşdırma Mərkəzi üzrə eksperti İsmayıl Tanrıverdi İrəvandakı son vəziyyəti şərh edərkən deyib.

Onun sözlərinə görə, Ermənistanda hazırda yerli hakimiyyət orqanları böyük təşviş içindədir:

"Sərkisyan bütün hakimiyyət qüvvələrini başına yığıb hazırda "Çiçəklənən Ermənistan" partiyasının sədri Qaqik Çarukyana (Dodi Qaqo) qarşı çıxışlar edərək bildirir ki, Dodi Qaqonu siyasətə biz gətirmişik, onun siyasətdən heç başı da çıxmır. Ancaq yerli əhali Çarukyanı dəstəkləyir və ölkə rəhbərliyində onu görmək istəyir. Fevralın 20-də saat 04:00-da Qaqik ümum-Ermənistan mitinqini təşkil edəcək. Demək olar ki, bəlkə də hər şey bu mitinqlə həll olunacaq. Çünki onlar dörd partiyanın birləşməsidir. Levon Ter Petrosyan, Raffi Ovanisyan, sonuncu - xalq arasında o qədər də nüfuza malik olmayan Dəmirçinyanın oğlu. Ermənicə "yeryak" (üçlük) adı altında birləşmiş bu üçlüyün gücü çoxdur. Hazırda xalq onları dəstəkləyir. Hətta İrəvanda ziddiyyətlərin kəskinləşməsində son nöqtəni dünən deputat Rustam Kasparyanın evinə 40 nəfərin hücum etməsi qoydu. Bu baxımdan da məsələ çox ciddidir. Hər şey fevralın 20-də bəlli olacaq. Bu tarix Sərksiyanla bağlı son sözü deyəcək".

Ekspertin sözlərinə görə, hazırda Sərkisyanla Çarukyan arasındakı savaşı durdurmaq üçün bir çox liderlər səfərbər olublar:

"Məlumata görə, Çarukyanın xalası oğlu Amerika və Moskvada məşhur milyarder kimi tanınan Karapetyan hazırda barışıq əldə olunması üçün İrəvana təşrif buyurmağa hazırlaşır. Eyni zamanda Petrosyan və bir sıra yerli hakimiyyət orqanları camaatı sakitləşdirmək üçün dəridən-qabıqdan çıxır. Onlar heç olmasa aprelin 24-nə soyqırım məsələsi həll edilənə qədər bu qarışıqlığın aradan qalxmasına çalışırlar. Vəziyyət olduqca gərgindir. Sərksiyanın hakimiyyətdən getməsi an məsələsidir".