Azərbaycan Prezident Administrasiyasının (PA) İctimai-siyasi məsələlər şöbəsinin müdiri Əli Həsənov ATƏT-in Minsk Qrupunun həmsədrlik institutu formatının dəyişdirilməsi və bu sıraya Türkiyənin də qatılması ilə bağlı səsləndirilən təkliflərə münasibət bildirib.

PA-nın şöbə müdiri Ə.Həsənov Ankarada Publika.az-ın əməkdaşının sualına cavabında deyib ki, zaman-zaman ATƏT-in Minsk Qrupunun həmsədr ölkələrinin təmsilçilik məsələsi müzakirəyə çıxarılıb. Onun sölərinə görə, Azərbaycan da Minsk Qrupunun fəaliyyətsizliyinə görə öz etirazını və narazılığını dilə gətirib:

"ATƏT-in Minsk Qrupunun fəaliyyətsizliyinin sonu olaraq Azərbaycan torpaqları 20 ildən artıqdır ki, işğal altındadır. Buna görə də Azərbaycan davamlı olaraq ATƏT-in Minsk Qrupunun həmsədrlərindən fəaliyyətlərini artırmasını gözləyir. Azərbaycan istəyir ki, həmsədrlikdə hansı ölkənin təmsilçiliyindən asılı olmayaraq, fəaliyyətlərini gücləndirsinlər, beynəlxalq hüquqa söykənərək hadisələrə obyektiv qiymət versinlər".