"Avropa öz ailəsində Azərbaycanı da görməkdə maraqlı və israrlıdır".

Bu sözləri Axar.az-a açıqlamasında NATO Əməkdaşlıq İnstitutunun rəhbəri Fərrux Məmmədov söyləyib.

O, Azərbaycanın Avropa Birliyi ilə assosiativ üzvlük haqqında sazişi yaxın zamanlarda imzalamayacağını bildirib:

"Avropa İttifaqı hər zaman Azərbaycana xüsusi önəm verib. Brüssel bu gün də həmin siyasətini davam etdirir. Təbii ki, Avropa öz ailəsində Azərbaycanı da görməkdə maraqlı və israrlıdır. Lakin Azərbaycanın Avropa ilə assosiativ üzvlük haqqında sazişi bu yaxınlarda imzalaması o qədər də real görünmür. Avropa ilə hər hansı strateji sənəd imzalana bilər. Assosiativ saziş üçün Azərbaycan daha böyük siyasi iradə nümayiş etdirməlidir ki, bu da hazırkı geopolitik vəziyyətdə ciddi məsuliyyət altına girmək deməkdir. Çünki bu saziş imzalandıqdan sonra geriyə dönüş yoxdur. Hazırkı durum bu sənədin imzalanmayacağını söyləyir. Lakin beynəlxalq siyasətdə maraqlar və fikirlər tez-tez dəyişir".

Qeyd edək ki, Azərbaycan Xarici İşlər nazirinin müavini Mahmud Məmmədquliyev bu gün mətbuata açıqlamasında Azərbaycanın Avropa Birliyi ilə assosiasiya sazişi deyil, strateji əməkdaşlıq haqqında sənəd imzalamasının tərəfdarı olduqlarını bildirmişdi.