Koronavirus dünyada sürətlə yayılmaqda davam edir. Virusun uzun inkubasiya dövrünün olması, yayılma sürəti və vaksininin hələ də tapılmaması yayıldığı ölkələri daha ciddi tədbirlər görməyə məcbur edir. Ümumdünya Səhiyyə Təşkilatı tərəfindən koronavirus infeksiyasının qlobal pandemiya elan olunduğunu nəzərə alaraq, virusun qarşısının alınması istiqamətində ölkəmizdə də bir sıra təxirəsalınmaz tədbirlərin həyata keçirilməsi zərurəti yaranıb. Nazirlər Kabineti yanında Operativ Qərargahın qərarı ilə 2020-ci il aprel ayının sonunadək bəzi sosial izolyasiya tədbirlərinin tətbiq olunacaq.

Məsələ ilə bağlı Axar.az-a açıqlama verən deputat Elman Nəsirov bildirib ki, ölkəmizdə məsələ ilə bağlı çox ciddi addımlar atılır.

“Koronavirus pandemiyası qlobal bir problemdir. Son məlumatlara görə, dünyanın 145 ölkəsində bu virusa yoluxma halı qeydə alınıb. Azərbaycanda da bu virusa yoluxma halları var. Artıq dünəndən etibarən Azərbaycanda xüsusi rejim tətbiq edilir. Bu addımın əsas məqsədi odur ki, Azərbaycan vətəndaşları təhlükədən qorunsun. Dövlət əlindəki bütün imkanlardan, resurslardan istifadə edir. Təsadüfü deyil ki, Prezident İlham Əliyev Milli Məclisin ilk iclasında məhz bu məsələyə də toxundu. Bütün bu tədbirlər cənab Prezidentin təşəbbüsü ilə həyata keçirilir və birbaşa onun nəzarətindədir”, - deputat bildirib.

E.Nəsirov vətəndaşları daha diqqətli olmağa çağırıb:

“İnsanlar ilk növbədə bunu bilməlidir ki, təşvişə düşmək lazım deyil. Virusun müalicəsi üçün ölkəmizdə də araşdırmalar aparılır. Hətta bununla bağlı xaricdən lazımı avadanlıqlar da gətirilib. Bununla belə, vətəndaşların da öhdəsinə düşən işlər var. İnsanlar ilk növbədə vətəndaşlıq borcunu bilməli və mövcud qadağalara əməl etməlidir. Gün ərzində mümkün qədər birbaşa təmasdan uzaq durmaq, əllə görüşməkdən imtina etmək lazımdır. İnsanların maska taxması da zəruri addımdır. İnsanlar ilk növbədə bunu bilməlidir ki, koronavirusun başlıca yayılma şəraiti yaxın təmasdır”.

Deputat onu da qeyd edib ki, Azərbaycanda koronavirusla bağlı vəziyyət digər ölkələrlə müqayisədə olduqca yaxşıdır:

“Amma bu hal bizi arxayınlaşdıra bilməz. Əhalinin qorunması üçün zəruri, bəzən də ən ciddi qadağalar tətbiq edilməlidir və edilir”.