Koronovirus barədə yaradılan beynəlxalq rəsmi saytda Azərbaycanın ərazi bütövlüyünə qarşı təxribat əksini tapıb.

Axar.az xəbər verir ki, Azərbaycanın işğal altında olan nəinki Dağlıq Qarabağ, ətrafındakı 7 rayonla birgə “Qarabağ respublikası” kimi göstərilib.

Bununla bağlı xaricdə yaşayan azərbaycanlı gənclər artıq səhifənin rəsmi ünvanına şikayət göndərib.

“Bu dəqiqə bütün dünyanın gözü bu saytdadır. Məhz burada virusun yayılma xəritəsi və sair vacib məlumatlar yerləşdirilib. İndi təsəvvür edin bizim tarixi torpaqlarımız işğalçı dövlətin əlifbası ilə yazılır...”, - deyə Bakı Gənclər Klubunun Beynəlxalq Departamentinin rəhbəri Sabir Rüstəmov saytımıza bildirib.

Quqlda “koronovirus” yazan kimi məhz bu rəsmi sayt birinci istifadəçilərin qarşısına çıxır. Və bu hal erməni lobbisinin hətta bəşəriyyət üçün belə bir çətin məqamda da öz çirkin əməllərindən əl çəkməməsindən xəbər verir.