Dünən Rusiya Prezidenti Vladimir Putin deputat Andrey Luqovoyu 2-ci dərəcəli "Vətən qarşısında xidmətinə görə" medalı ilə təltif etdi. 1966-cı ildə Bakıda anadan olan Luqovoy həm də qaranlıq keçmişi ilə özünə kifayət qədər şöhrət qazana bilib. Axar.az bu məşhur deputatın həyat yolundakı maraqlı məqamları təqdim edir.

KQB-nin məşhur zabiti

Hərbçi ailəsində anadan olan Luqovoy 1987-ci ildə hərbi təhsilini bitirdikdən sonra Kreml alayına göndərilir. Həmin vaxtlar birbaşa Dövlət Təhlükəsizlik Komitəsinə (KQB) tabe olan alayda mühüm vəzifələrdə yer alan Luqovoy tezliklə daha da irəliyə çəkilir. 1991-1996-cı illərdə o, Rusiya Baş Mühafizə İdarəsi, Rusiya Prezidentinin Təhlükəsizlik Xidmətində çalışır. Bundan əlavə isə Luqovoy Baş nazir Yeqor Qaydar, Prezident Administrasiyasının rəhbəri Sergey Filatov, Xarici İşlər naziri Andrey Kozırev, Baş nazirin birinci müavini Bolşakovun mühafizəsinə rəhbərlik edir.

İndiyə qədər Rusiya mətbuatı Luqovoyun Federal Təhlükəsizlik Xidmətinin (FSB) eks-əməkdaşı olduğunu bildirir. Lakin maraqlı məqam ondan ibarətdir ki, deputat KQB-nin 9-cu idarəsində işlədiyini təsdiqləsə də, qalan şeylərin hamısını rədd edir.

Aeroflot əməliyyatı

1997-ci ildən etibarən "Aeroflot" şirkəti ətrafında söhbətlər qızışmağa başlayır. Bir müddət sonra Moskva şirkət rəhbərliyinə qarşı araşdırmaya start verir. Tezliklə "Aeroflot"un baş direktoru Nikolay Qluşkov və səhmlərin əsas sahibi olan Boris Berezovskiyə qarşı şirkətin hesabından 252 milyon oğurlamaları ilə bağlı ittiham irəli sürülür. Bundan sonra Rusiya xüsusi xidmət orqanları hərəkətə keçir və 2000-ci ildə Nikolay Qluşkov həbs olunur.

O, məhşur Lefortova həbsxanasına göndərilir.

Elə bu məqamda ilk dəfə yerli mətbuatın hədəfinə Andrey Luqovoy düşür. O, Qluşkovun həbsdən qaçırılmasının təşkil edilməsinə görə həbs edilir və 1 il 2 ay müddətinə azadlıqdan məhrum edilir. İstintaqın məlumatına görə, bu qaçışı Boris Berezovskinin partnyoru olan mərhum gürcü milyarder Badri Patarkaçişvili təşkil edir. Lakin Qluşkov bu iddiaların hamısını rədd edir və bunun qəsdən törədildiyini bildirir. O, hər şeyin FSB tərəfindən düşünüldüyünü və Luqovoyun da bu planın bir parçası olduğunu söyləyir. Burada əsas məqsədin isə Qluşkovun həbsdə saxlanılmasını uzatmaq olduğu deyilir.

Nəticədə əməliyyat uğurla başa çatır və Qluşkov sonradan üç il müddətinə həbsə məhkum edilir. Boris Berezovski ölkəni tərk edir və Rusiyadakı bütün mülkləri əlindən alınır.

"Litvinenko əməliyyatı": Putinin düşmənləri yox edilir

2006-ci ildə Andrey Luqovoy və Dmitri Kovtun keçmiş tanışları olan Aleksandr Litvinenko ilə görüşmək üçün Londona yola düşürlər. Bu uçuşdan bir müddət sonra Putinin əsas düşmənləri sırasına daxil olan keçmiş FSB zabiti Aleksandr Litvinenko zəhərlənərək qətlə yetirilir. Tezliklə işi araşdıran Britaniya xüsusi xidmət orqanları onun "polonium 210" maddəsi ilə zəhərləndiyini sübut edir. Bundan sonra bəlli olur ki, Litvinenko noyabrın 1-də "Millenium" otelinin barında zəhərlənib. Maraqlı məqam orasındadır ki, keçmiş agent məhz bu oteldə Luqovoy və Kovtunla görüşmüşdü. Lakin deputat ona qarşı irəli sürülən ittihamları hamısını rədd edir və öz versiyalarını səsləndirməyə başlayır. O, Litvinenkonun ölümündə Britaniya kəşfiyyatı, rus mafiyası, ya da ki, Boris Berezovskinin günahkar ola biləcəyini qeyd edir. Luqovoy sonralar Boris Berezovski və Litvinenkonun Britaniya kəşfiyyatına çalışdıqlarını, onu da Londona Putin haqqında əlavə informasiya yığmaq üçün dəvət etdiklərini söyləyir.

Lakin London buna səssiz qalmır. 2007-ci ildə Luqovoy Kremldən tələb edilir. Moskva isə bunun öz Konstitusiyasına zidd olduğunu deyərək, onu verməkdən imtina edir. Nəticədə diplomatik qalmaqal yaşanır. Britaniyanın 4 rus diplomatını ölkədən qovmasına Moskva eyni reaksiyanı verir.

Lakin Luqovoyun fəaliyyəti bununla bitmir. Sonralar bəzi ekspertlər onun Yeqor Qaydarın zəhərlənərək öldürülməsində iştirak etdiyini iddia edirlər. Bununla bərabər Luqovoyun təhlükəsizlik şirkətləri Boris Berezovskinin öldüyü ana qədər onun mühafizəsini təşkil edirlər. Maraqlı məqam isə Litvinenkodan sonra Badri Patarkaçişvili (2008) və Boris Berezovskinin (2013) də guya ölmüş vəziyyətdə tapılmasıdır. Doğrudur, sonralar onların ölümündə müxtəlif iddialar səsləndirilsə də, bunların sırasında Luqovuyun adı heç bir zaman əskik edilmir.

Hazırda Luqovoy deputatdır. O, həm də 2007-ci ildən Jirinovskinin Liberal Demokrat Partiyasının üzvüdür. Andreyi bura məhz Jirinovskinin özü dəvət edib. Bir zamanlar KQB-də çalışdığı üçün bəziləri onu Putinlə eyniləşdirməyə çalışırlar. Bir sıra şəxslər hətta bu adamın gələcəkdə FSB rəhbərliyinə gətirilməsi ehtimalı olduğunu da söyləyir.

Hazırda Luqovoy həm də iş adamı kimi fəaliyyət göstərir. "Forbes" jurnalının hesablamalarına görə, onun rəsmi sərvəti 2 milyon dollardır.