Səudiyyə Ərəbistanı kralı Salman bin Əbdüləzizin verdiyi qərarların arxasında vəliəhd Məhəmməd bin Salman dayanır. Krallıqdakı yenilikçi qərarlar gənc şahzadəyə məxsusdur.

Bu sözləri Axar.az-a açıqlamasında politoloq Qabil Hüseynli Səudiyyə Ərəbistanı kralı Salman bin Əbdüləzizin yetkinlik yaşına çatmayan cinayətkarların edam edilməməsi haqqında qanunu imzalamasını şərh edərkən deyib. Politoloq vurğulayıb ki, Səudiyyə Ərəbistanında ciddi qanun dəyişikliklərinə ehtiyac var:

“Səudiyyə Ərəbistanı bu gün Yaxın Şərqin və müsəlman aləminin aparıcı ölkələrindəndir. Buna baxmayaraq, ölkə daxilində ciddi dəyişikliklərə ehtiyac var. Ölkə daha çox islami-şəriət qanunları ilə idarə edilir. Məhkəmələrin tətbiq etdiyi edam və qamçılama kimi cəzalar həm müasir dövrün tələblərinə, həm də humanizm prinsiplərinə sığmırdı. Sevindirici haldır ki, bunlar ləğv edildi”.

Q.Hüseynlinin sözlərinə görə, son zamanlar Səudiyyə Ərəbistanında bir çox yenilikçi qərarlar qəbul edilib:

“Bunlara misal olaraq qadınların maşın sürməsinə, küçələrdə sərbəst dolaşmasına icazə verilməsi, həmçinin qamçılama cəzasının ləğv edilməsi və 18 yaşına çatmamış şəxslərin edam edilməməsini göstəmək olar. İlk başda bunlar elə də ciddi addım kimi görünməyə bilər, lakin Səudiyyə cəmiyyəti üçün bunlar son 100 ildə verilən ən iddialı və inqilabi qərarlardır. Vəliəhd Salman ölkədə qəbul edilən yenilikçi qanunların əsas memarı hesab edilir. Düşünürəm ki, vəliəhd bu fəaliyyəti ilə gələcək hakimiyyəti üçün münbit zəmin yaratmaq və xalqın sevgisini qazanmaq istəyir. Bütövlükdə isə Səudiyyə Ərəbistanında qəbul edilən bu qanunları müsbət qiymətləndirirəm. Bu humanist addımların gələcəkdə də davam etdirilməsi arzulanandır”.