Gürcüstanda azərbaycanlıları tərkibində cəm edən "Mişa yolu" hərəkatı yaradılıb.

Bu barədə Axar.az-a təşkilatın həmtəsisçilərindən biri olan Samira İsmayılova məlumat verib.

O bu təşkilatın azərbaycanlıların Gürcüstan cəmiyyətinə inteqrasiyasına yardım edəcəyini bildirib:

"Bu təşkilatın yaradılması təşəbbüsü ilk olaraq azərbaycanlı gənclər tərəfindən səsləndirilib. Yaranma məqsədi isə Gürcüstanın keçmiş prezidenti Mixail Saakaşvilinin həmfikirlərini və tərəfdarlarını bir araya gətirməkdir. Bildiyiniz kimi, Saakaşvili hakimiyyətdə olduğu müddətdə Gürcüstan azərbaycanlılarına çox böyük dəstək oldu və illərcə bizə qarşı davam edən diskriminasiyanı aradan qaldırdı. Eyni zamanda o, etnik azlıqların cəmiyyətə inteqrasiyası üçün şərait yaratdı. Bugünkü gündə ölkədə olan proseslərə baxanda bir çox proseslərin etnik azlıqların əleyhinə yönəldiyi görünür. Hətta vəziyyət o həddədir ki, etnik azlıqların bəzən gürcü cəmiyyətinin ayrılmaz bir hissəsi olduğu hiss olunmur. Sanki Saakaşvilinin ölkədən getməsilə azərbaycanlılar tamamən unuduldular. Elə bu səbəbdən biz Gürcüstan azərbaycanlıları Mişanın başladığı yolu davam etmək istəyirik".

Qeyd edək ki, Samirə İsmayılova Mixail Saakaşvilinin prezidentliyi dönəmində prezidentin etnik azlıqlar üçün müşavir-konsultantı çalışıb. Bundan əlavə o, Gürcüstan Təhsil nazirinin konsultantı olub. Gürcüstanda kifayət qədər tanınan Samirə İsmayılova həm də Azərbaycanlı Tələbələrin Gürcüstandakı Assosiasiyasının rəhbəridir.