2014-cü ilin yanvar ayında Azərbaycan və Ermənistan xarici işlər nazirlərinin ilk görüşü keçiriləcək. bu barədə ATƏT-in rəsmi saytının yaydığı açıqlamada bildirilib.

Qeyd edək ki, dünən Minsk Qrupu həmsədrləri Azərbaycan, Ermənistan və Dağlıq Qarabağa səfərləri bağlı birgə bəyanat veriblər. Bəyanatda bildirilir ki, İqor Popov (Rusiya), Jak For (Fransa) və Ceyms Uorlik (ABŞ), o cümlədən ATƏT-in fəaliyyətdə olan sədrinin şəxsi nümayəndəsi Andrzej Kasprşik, Dağlıq Qarabağ münaqişəsinin həlli prosesində son vəziyyəti müzakirə etmək üçün 15-19 dekabr tarixlərində bölgədə səfərdə olublar.

Həmsədrlərin Azərbaycan və Ermənistan prezidentləri və qondarma "DQR"in rəhbəri ilə görüşdükləri və prezidentlərin Vyanada, xarici işlər nazirlərinin isə Kiyevdə apardıqları müzakirələrin nəticələri barədə fikir mübadiləsi apardıqları bildirilir.

ATƏT-in rəsmi saytının açıqlamasında qeyd olunur ki, həmsədrlər 2014-cü ilin yanvar ayında ATƏT-in yeni rəhbəri ilə münaqişə ilə bağlı müzakirə aparmaq üçün İsveçrəyə gedəcəklər. Onlardan sonra hər iki ölkənin xarici işlər nazirlərinin gözlənilən zirvə toplantısına hazırlıqla bağlı görüşləri planlaşdırılır (anspress.com)