"Yaxın aylarda Donetskdə Abxaziya, Cənubi Osetiya, Dnestr və Dağlıq Qarabağ liderlərinin görüşü planlaşdırılıb. Aydındır ki, separatçıları məhz Donetskdə görüşdürmək Moskvanın planıdır".

Axar.az xəbər verir ki, bu açıqlama ilə politoloq Elxan Şahinoğlu çıxış edib. O, rəsmi Bakının Qarabağ separatçılarının Donetskə getməsini əngəlləmək üçün hərəkətə keçməli olduğunu bildirib:

"Xatırlayırsınızsa, Abxaziya, Cənubi Osetiya, Dnestr və Dağlıq Qarabağın separatçı liderləri ara-sıra görüşür, fikir mübadiləsi aparırdılar. Gələn xəbərlərə görə, bu dördlüyə Donbas separatçılarının liderləri də qoşulacaqlar. Yaxın aylarda Donetskdə Abxaziya, Cənubi Osetiya, Dnestr və Dağlıq Qarabağ liderlərinin görüşü planlaşdırılıb. Aydındır ki, separatçıları məhz Donetskdə görüşdürmək Moskvanın planıdır. Ona görə də Bakı indidən diplomatik kanallarla Moskvaya mesaj ötürməlidir ki, əgər Donetskə Dağlıq Qarabağ separatçılarının lideri dəvət olunsa, bu, Rusiyanın Azərbaycana qarşı xoş olmayan jesti kimi dəyərləndiriləcək..."