"Türkiyə-Azərbaycan-Gürcüstan müdafiə nazirlərinin formatı hər üç tərəfin istəyi ilə reallaşıb".

Bu sözləri Axar.az-a açıqlamasında Mixail Saakaşvilinin Gürcüstan Vahid Milli Hərəkat Partiyasının üzvü, keçmiş deputat Ramin Bayramov söyləyib.

Onun sözlərinə görə, bu format Rusiya təhdidinə qarşı dayana bilər:

"Rusiya xoş qonşuluq münasibətlərini nəzərə alan ölkə deyil. Rusiya yalnız gücün olub-olmamasına reaksiya verir. Rusiyanın aqressiv fəaliyyəti nəticəsində gərginlik artarsa, Ermənistan Kremlin Qafqazdakı bələdçisi olacaq. Nəticədə İrəvanın özü alovun episentrinə düşəcək. Türkiyənin bu formata daxil edilməsi onun regiona olan marağından irəli gəlir. Nəticədə regionun təhlükəsizlik və stabilliyi üçün ümidlər yaranır. Lakin bu da hələ tam qarant anlamını vermir. Gürcüstan gərək Kremlə qarşı öz mövqeyini daha dəqiq ifadə etsin və Azərbaycanla Türkiyənin strateji müttəfiqi olmasıyla bağlı sarsılmaz iradəsini ortaya qoysun".