Etnik prinsip əsasında ümumi vahid media platformasının yaradılması mürəkkəb məsələdir.

Bunu Axar.az-a açıqlamasında media eksperti, professor Qulu Məhərrəmli Teleqraf Media Qrupunun rəhbəri, politoloq Aynur Camalqızının Real TV-nin “Real İntervyu” proqramında çıxışı zamanı türk dünyasının maraqlarına xidmət edən CNN və “Əlcəzirə” formatında vahid media orqanının yaradılması ilə bağlı təklifini şərh edərkən deyib.

Professorun sözlərinə görə, türkdilli dövlətlər arasında belə ideyanı konkret layihə kimi reallaşdırmaq mümkündür:

“Hazırda Azərbaycan-Türkiyə vahid platformasını yaratmaq istəyirik. Bu barədə əvvəldən danışıqlar aparılıb. Amma türkdilli ölkələrdə fərqli maraqlar, fərqli siyasi sistemlər var. Ona görə də burada ümumi media platformasını yaratmaq çətindir. Məsələn, indi türkdilli xalqların ortaq televiziya kanalları nəyi yayır? Musiqi, mədəniyyət və sair kimi sahələrə aid materialları. Bu cür informasiya axınını təmin etmək mümkündür, amma geniş mənada xəbərləşmə, analitika, araşdırmalar - bunlar çətin prosesdir. Amma bu arzu gerçəkləşsə, türkdilli dövlətlər üçün mühüm informasiya mənbəyi olar”.