"Davudoğlunun bu bəyanatı türklərin ermənilər tərəfindən soyqırıma məruz qalması gerçəyinə xələl gətirə bilər".

Axar.az xəbər verir ki, bu açıqlama ilə politoloq Fərhad Mehdiyev çıxış edib. O, Türkiyə baş nazirinin ermənilərə başsağlığı verməsini ciddi səhv hesab edir:

"Əhməd Davudoğlunun ermənilərə başsağlığı veriləcəyinə dair bəyanatı olduqca uğursuz addımdır. Bu, indiyə qədər ermənilərin Anadoluda minlərcə türkü qətlə yetirməsi iddiasının inkarı kimi başa düşülə bilər. Öncəliklə ermənilər buna görə türklərə başsağlığı versəydi, bax onda türklər də ermənilərə belə bir nəzakət və qarşılıq göstərərdilər. Hesab edirəm ki, bu, çox ciddi bir səhvdir. Çünki əslində Davudoğlunun bu jesti Qərbin təzyiqlərinə boyun əyməklə yanaşı, onların iddialarının doğruluğunu qəbul etmək anlamına gəlir".

Qeyd edək ki, Türkiyənin Baş naziri Əhməd Davudoğlu 24 apreldə Osmanlı ermənilərinin bütün dünyada olduğu kimi Türkiyədə də yad ediləcəyini açıqlayıb.