Heç bir ağlı başında olan, düşünən insan Qarik Çarukyanın dünən məhz siyasi motivlər əsasında həbs olunduğuna şübhə etmir.

Axar.az xəbər verir ki, bu sözləri Vahid Ermənistan Partiyasının qurucusu, hüquq elmləri namizədi Artur Kazinyan öz Feysbuk səhifəsində paylaşıb.

“Mən 2017-ci ildə keçirilən parlament seçkilərində seçkiqabağı rüşvətin paylanmadığı düşüncəsindən uzağam, lakin bununla yalnız Çiçəklənən Ermənistan Partiyasının məşğul olduğuna inanmaq çətindir. Bir çox analitikin fikrincə, Çarukyanın təcrid olunması oktyabrın 8-nə təyin olunmuş mitinqlə bağlıdır. Çarukyanın həbs qərarı, dövlət maraqlarına qarşı və xalqın arxasından düşmənlə gizli anlaşmaya dair etirafından sonrakı səs-küyləri əhəmiyyətli dərəcədə boğdu. Çarukyan güclü iradəyə malik adamdır, həbsdə tab gətirəcək”, - Kazinyan bildirib.

Qeyd edək ki, Nikol Paşinyan Qarabağ münaqişəsinin həlli ilə bağlı Azərbaycan nümayəndələri ilə 2018-ci ildə məxfi danışıqlar apardığı haqda məlumat yayılıb. N.Paşinyan Azərbaycanı bu məxfi məlumatları sızdırmaqda ittiham edib.