"Türkiyənin Çanaqqala zəfərinin 100 illiyinə necə möhtəşəm hazırlaşdığının yaxından şahidi oldum".

Axar.az xəbər verir ki, bu barədə hazırda Türkiyədə olan "Atlas" Araşdırmalar Mərkəzinin rəhbəri, politoloq Elxan Şahinoğlu məlumat verib. Politoloq bildirib ki, bütün bir sıra qaralama kampaniyalarına və Türkiyəyə qarşı aparılan təxribatlara rəğmən, 25 aprel çox böyük bir gün olacaq:

"Türkiyənin Çanaqqala zəfərinin 100 illiyinə necə yaxşı hazırlaşdığı İstanbulda hiss edilir. Bu gün türklərlə yanaşı ermənilərin də yaşadığı İstanbulda "erməni soyqırımı olmayıb" plakatları ilə üzləşdim. Ərdoğanın İstanbulda "Sülh konfransı" da ermənilərin antitürk siyasətinə cavablardan biridir. Sabah Çanaqqalada möhtəşəm tədbir təşkil olunacaq. 25 apreldə bilinəcək ki, kim kimi üstələyib. Türkiyə bir dövlət olaraq erməni lobbisi ilə mübarizə apardığı hazırkı dönəmdə ölkəyə qarşı qaralama kampaniyaları davam etdirilir. Qeyd edim ki, CNN Türk-ün "Nə baş verir" proqramındakı tarixçilər cəmiyyəti "soyqırımın" olduğuna inandırmağa calışırlar. Erməni lobbisinə əla pas verirlər. Lakin bütün bunlara baxmayaraq, aprelin 25-də bütün türk xalqlarını möhtəşəm bir gün gözləyir".