"Soyqırımlardan deyil, Çanaqqaladan itirilmiş torpaqlara getməyi bacaranları meydanda görmək istərdim".

Axar.az xəbər verir ki, bu haqda Zahid Oruc açıqlama verib. O, bildirib ki, dünyanı ədalətsizlikdə qınamağı tarixə buraxmaq, artıq meydanlara çıxmaq vaxtıdır:

"Dünya informasiya məkanının nəhəngləri - BBC, CNN və "Euronyus" "Çanaqqala zəfəri"ni birbaşa yayımlayır. Düz 100 il öncə ingilis və fransız ordularının dağıdıldığı yerdə indi Britaniya hərbi orkestri xatirə ritualları keçirir, dini liturgiya və ayinlər icra edir. Əski və qalib türk əsgərinin memorial abidənin əhatəsində görənlər iki əsr arasında dəyişən və qüdrətlənən türk ordusunun kiçik bir parçasını gördülər. Onlar Çanaqqaladan keçib cümhuriyyətin quruculuğunda iştirak etmiş, imperializmə qalib gələrək müstəqil dövlət qurmuşdular. İndi bir əsr əvvəl Türkiyəni məğlub tərk edənlər şanlı bir ordunun qələbəsinin başına toplaşıblar. Bax, dünyaya bu sifətlə çıxmaq gərəkdir. Fatehlik və uğurun tərəfdarları hər zaman çox olur. İrəvanın üzərini örtən hadisə bax budur. Məğlubiyyət, qırılma, matəm, mərsiyyə, şikayət və yardım istəklərini bir kənara buraxıb, dünyaya yeni sifətdə çıxmağı düşünmək lazımdır. Milli kodunu və əfsanəvi tarixini unudub da şikayətçi bir üslubda dünyanı ədalətsizlikdə qınamağı tarixə buraxmaq vaxtıdır.

Ərdoğan bir zamanlar Yaponiya dövlətinin etdiklərini gerçəkləşdirməyə qadir oldu. Gündoğar ölkənin vətəndaşları xarakiri keçmişini bir kənara ataraq təhsilə, elmə, texnologiyaya və ədalətli cəmiyyətə qovuşa bilmişdilər. Soyqırımlardan deyil, Çanaqqaladan itirilmiş torpaqlara getməyi bacaranları meydanda görmək istərdim".