Türkiyədə daha 12 nurçu polis saxlanılıb.

Axar.az xəbər verir ki, Van şəhərində şübhəli şəxs qismində saxlanılan 18 polisdən 12-si barəsində həbs qərarı çıxarılıb. Onlar siyasətçilərin, dövlət qulluqçuları və sahibkarların telefonlarını qeyri-qanunu dinləməkdə ittiham olunurlar. Hökumət bildirir ki, telefonların gizli dinlənilməsi ABŞ-da mənzillənən Fəthullah Gülənin apardığı hökumət əleyhinə kampaniyanın tərkib hissəsidir.

Gülənin özü ittihamları rədd edib. Dekabr ayında Türkiyə məhkəməsi Gülənin həbsinə sanksiya verib. Lakin onun Türkiyəyə təslim ediləcəyi ehtimalı qeyri-real görünür. Prezident Rəcəb Tayyib Ərdoğan bir vaxtlar müttəfiqi olmuş ruhanini, o cümlədən mətbuatda olan tərəfdarları vasitəsilə hakimiyyəti devirmək cəhdində suçlayıb. Dekabrda polis Gülənlə əlaqəsi güman edilən qəzet və teleşirkətlərin ofislərində axtarış keçirərək bir neçə media nümayəndəsini həbs edib.