"Azərbaycanda keçirilən mötəbər tədbirləri, "Avroviziya" mahnı müsabiqəsini, indi də I Avropa Oyunlarını ermənipərəst qüvvələr və erməni diasporu hər vəchlə gözdən salmağa çalışır".

Axar.az xəbər verir ki, bu sözləri millət vəkili Qüdrət Həsənquliyev APA-ya geniş müsahibəsində deyib. Millət vəkilinin sözlərinə görə, insan haqları ilə bağlı problemlər hər bir ölkədə var:

"Bakıda keçirilən Avropa Oyunlarının üzərinə bu problemlərdən istifadə edərək kölgə salınması qətiyyən yolverilməzdir. Əvvəla, bu oyunları siyasiləşdirmək olmaz. Digər tərəfdən, Azərbaycanda hər bir vətəndaş bilməlidir ki, bu oyunlar ölkəmiz üçün son dərəcə əhəmiyyətlidir. Çünki erməni diasporu bizi İslam dünyasının ən geri qalmış və yarı vəhşi ölkəsi kimi təqdim etməyə çalışır. Azərbaycanı Qərbdə sadə insanlar tanımırlar. Mən özüm xaricdə səfərlərdə oluram və görürəm ki, bəzi hallarda Azərbaycanın harada yerləşdiyini bilmirlər. Ona görə də "Avroviziya" mahnı müsabiqəsi, I Avropa Oyunları, İslam Həmrəylik Oyunları, "Formula-1" və dünyada böyük diqqət cəlb edəcək digər tədbirlərin Azərbaycanda keçirilməsi ölkəmizin yaxşı mənada tanıdılması üçün böyük fürsətdir. Burada biz Azərbaycanın Avropa dəyərlərini mənimsəmiş xalq olduğunu ortaya qoyacağıq. Eyni zamanda, xalqımızın nə qədər xeyirxah, qonaqpərvər və alicənab olduğunu nümayiş etdirəcəyik. Çünki ermənilər deyirlər ki, Qarabağ erməniləri bizimlə bir yerdə yaşaya bilməz. Bizi bir çox halda aşağı səviyyəli, mədəniyyətsiz xalq kimi təqdim etməyə çalışırlar. Amma biz göstəririk ki, burada tolerantlılıq, dözümlülük var, müxtəlif millətlərin nümayəndələri Ermənistandan fərqli olaraq, burada birgə yaşayırlar".

Millət vəkilinin fikrincə, ABŞ-ın indiki məqamda Azərbaycana bu təzyiqinin arxasında öz maraqları dayanır:

"ABŞ-ın özündə insan haqları ilə bağlı ciddi problemlər var. Orada qaradərililərə qarşı olan zorakılıqlar, irqi ayrı-seçkilik, insanların polis zorakılığına məruz qalması və polislər tərəfindən qətlə yetirilməsi, həbsxanada yatanların böyük əksəriyyətinin qaradərili olması, qaradərililər arasında işsizlik, təhsil problemi, ağdərililər və qaradərililərin bir-birini qəbul etməmələri çox ciddi problemlərdir. Dövlət siyasəti bu problemin aradan qaldırılmasına yönəlməlidir. Ancaq görürsən ki, öz daxilindəki problemlərdən ictimaiyyətin diqqətini yayındırmaq üçün başqa ölkələrdəki insan haqları məsələsinə daha çox diqqət yetirilir.

Əlbəttə, ABŞ Konqresi tərəfindən maliyyələşdirilən radionun əməkdaşı, ABŞ-dakı qeyri-hökumət təşkilatlarından qrant alan QHT rəhbərləri var ki, onlar hazırda Azərbaycanda həbsdədir. Bu da ABŞ-ı qıcıqlandırır və həmin şəxslərin azad olunmasını tələb edir. Mən əvvəllər də bu fikirdə olmuşam ki, hətta onların əsaslı və ya əsassız həbsindən asılı olmayaraq, 5-6 nəfərin cəza almasına görə biz böyük dövlətlərlə, dünyada tanınmış insan haqlarını müdafiə təşkilatları ilə üz-üzə gəlməməliyik, onları azad etməliyik. Vaxtilə biz Azərbaycanın ərazi bütövlüyünə qarşı çıxan, etnik separatizmi yaradan, talışlarla Azərbaycan türkləri arasında qarşıdurma yaratmaq istəyən milli satqın Ələkrəm Hümbətovu belə əfv etmişik. O zaman əsaslandırmışdıq ki, bu adama görə beynəlxalq təşkilatlarla qarşıdurmaya getmək lazım deyil. Hesab edirəm ki, o cür ağır cinayətlərə görə məhkum olunmuş bir şəxsi azad edən hökumət digər şəxsləri də azad edə bilər. Mən həm də hökuməti Tofiq Yaqublu başda olmaqla, həmin o beynəlxalq təşkilatlar tərəfindən vicdan məhbusu hesab edilən digər şəxsləri azad etməyə çağırıram".

Q.Həsənquliyev Milli Şuranın bu qara kampaniyaya qoşulmasına da münasibət bildirib:

"Milli Şuranın adından fərqli olaraq, heç bir milliliyi yoxdur. Xatırlayırsınızsa, bu qüvvə hakimiyyətə gəlmək üçün son prezident seçkiləri ərəfəsində İran və Rusiya ilə də əməkdaşlıq edib. Bütün bunlar onu göstərir ki, bu adamlar istənilən qüvvənin əli ilə hakimiyyətə gəlməyə hazırdırlar. İndi də Milli Şura ABŞ və Avropa ölkələrinin tapşırığı və verəcəyi maliyyəyə görə Azərbaycanda istənilən mövqeni nümayiş etdirməyə hazırdır. Burada da təəccüblü bir şey yoxdur. Bu proseslərdə xarici qüvvələr onlardan istifadə etməyə çalışır və çalışacaqlar. Bu, birmənalı belədir".