Bu gün Azərbaycanın həm hərbi, həm mənəvi, həm hüquqi, həm diplomatik üstünlüyü, həm də Dövlət-Xalq-Ordu birliyi Qələbənin təminatına çevrilib.

Axar.az xəbər verir ki, bu fikirləri ekspert Natiq Cəfərli deyib.

“ABŞ-da görüş başa çatdı, gözlənilən kimi heç bir sənəd imzalanmadı, imzalanması mümkün də deyildi. Çünki Rusiya onun birbaşa iştirakı olmadan hansısa sənədin imzalanmasına razı ola bilməzdi.

Düşünürəm, bu görüş ABŞ-da qarşıdan gələn seçkilərə hesablanıb və sadəcə vizual görüntü xarakteri daşıyır. Xüsusilə Prezident Tramp bu işlə məşğuldur. Amma Ağ Ev Qarabağ məsələsində həm də ona görə aktiv deyil ki, Kaliforniya ştatı demokratlara səs verir. Tramp bu məsələdə də daha praqmatik davranır.

Ermənistan tərəfinin indi ən çox istədiyi odur ki, 3-5 gün savaş dayansın, silah-sursat, canlı qüvvə itkisi kompensasiya edilib yenidən hücuma keçib Hadrutu, ya da başqa işğaldan azad edilmiş böyük şəhər və ya qəsəbənin birini yenidən işğal edib sınmış dirənişlərini bir az bərkitsin. Amma görünən odur ki, öz axmaq siyasətləri və Azərbaycanın “de-fakto” bağladığı ittifaqlar, doğru xarici siyasət, güclü Ordu onları ortada tək qoyub.

Allah Əsgərimizi və Ordumuzu qorusun!”