Azərbaycan Ordusunun əks-hücum əməliyyatına başlamasından sonra Prezident İlham Əliyev xarici təbliğat və Azərbaycan həqiqətlərinin dünyaya çatdırılması istiqamətində dayanmadan çalışır. Eyni zamanda ölkə başçısı müntəzəm olaraq xalqı da mövcud vəziyyətlə bağlı məlumatlandırır. Prezident bu gün də vacib məqamlara toxunub.

Axar.az xəbər verir ki, bu fikirləri ekspert Natiq Cəfərli deyib.

O, Prezidentin çıxışından gəldiyi nəticələri sıralayıb:

”Birincisi, Prezidentin çıxışından da məlum olur ki, həmsədr dövlətlər – Rusiya, ABŞ, Fransa Qarabağ məsələsinin birdəfəlik həllini istəmir. Çünki münaqişənin yarım qalması hər zaman tərəflərə təzyiq üçün də imkan yaradır.

İkincisi, de-fakto bağlanan ittifaqlar işləyir. Yəni Azərbaycan kağız üzərində imzalanmasa da, faktiki olaraq bu gün də öz təsirini göstərən ittifaqlar qurub. Söhbət tək qardaş Türkiyədən getmir. Prezident ona görə bir neçə dəfə dedi ki, “sözümüz imzamızdır”. Bu faktiki ittifaqlar önümüzü açıb, təzyiqlərə dözməyə imkan yaradıb.

Üçüncüsü, Madrid Prinsipləri, 5+2 formatı və s. təkliflər artıq öz mahiyyətini itirib. Artıq yeni prinsiplər lazımdır, amma Minsk Qrupu bunu hələ qəbul etmək istəmir. Düşünürlər ki, Ermənistan əks-həmlə edərək situasiyanı dəyişə, köhnə formata qayıda bilər. Bunun üçün onları silahlandırırlar. Məhz bunun üçün atəşkəsi həmişə Ermənistan pozur.

Dördüncüsü, Prezidentin Rusiyaya mesajları daha açıq idi. Ermənistanın Rusiyanın kuklası, sözçüsü olması daha açıq şəkildə dünyaya çatdırılmalıdır. Bu, beynəlxalq anti-Rusiya çevrələri üçün tutarlı arqumentə çevriləcək.

Beşincisi, Ermənistanın bölgədə böyük neft-qaz dəhlizlərinə təhlükə olduğunu və bu təhkükənin yaranmasının indi Kremlə sərf etdiyini (Şimal Axını-2 layihəsinə görə) daha aydın şəkildə dünyaya izah etmək lazımdır.

Allah Əsgərimizi və Ordumuzu qorusun!”