Ana səhifə Gündəm |
Azərbaycanın işğal altındakı torpaqlarının düşməndən geri alınması müasir dünyanın ən səs-küylü hadisəsidir. Azərbaycan bu hərbi-siyasi uğuru ilə bütün dünyaya mesaj verdi ki, beynəlxalq hüquq və ədalət hamı üçün bərabər olmalıdır. Şanlı Azərbaycan Ordusu düşmənə də, onun havadarlarına da göstərdi ki, haqqı olanı kimsə ona minnətlə qaytara bilməz, onu öz gücü, öz iradəsi ilə almağa qadirdir. Şanlı Azərbaycan Ordusunun şücaəti barədə xəbərlərdən qurur duyuruq.
Axar.az xəbər verir ki, bu fikirləri AzərTac-a açıqlamasında Türkiyənin Bursa vilayətinin Osmanqazi bələdiyyəsinin sədri Mustafa Dündar deyib.
Azərbaycan Ordusunun düşməni bütün cəbhələrdə məğlub etməsinin hər bir türkiyəli üçün qürur mənbəyi olduğunu bildirən Mustafa Dündar deyib: “Torpaqlarımız uğrunda şəhid və qazi olan qəhrəman övladlarımızın xatirəsini əbədiləşdirmək, bu istiqamətdə davamlı işlər görmək hər birimizin mənəvi borcudur. Şəhid general Polad Həşimovun xatirəsinin əbədiləşdirilməsi Azərbaycanın ərazi bütövlüyü uğrunda şəhid və qazi olan bütün qəhrəmanlara göstərilən hörmət və ehtiram, Azərbaycana mənəvi dəstəyin nümunəsidir. Məqsədimiz odur ki, gələcək nəsillər keçdiyimiz, yaşadığımız ağır illəri və hadisələri unutmasınlar. Əminliklə deyə bilərəm ki, general Polad Həşimov Parkı Azərbaycanın şərəfli hərb tarixinin bir hissəsinə çevriləcək. Bu park Azərbaycanı sevən insanların tanıdığı məkan olacaq. Bundan başqa, bu parkda Azərbaycana dair tədbirlərin keçirilməsi istər-istəməz Qarabağla bağlı yaşadığımız sıxıntıları, yaxın və uzaq tarixdə insanlara xatırladacaq”.
Polad Həşimov Parkının salınması təşəbbüsü ilə çıxış etdiyinə görə Dünya Azərbaycanlıları Platformasının rəhbərliyinə minnətdarlığını ifadə edən bələdiyyə sədri Mustafa Dündar bildirib ki, milli-mənəvi dəyərlərimizin inkişafına xidmət edən bu fəaliyyətlər gələcəkdə də davam etdirilməlidir
Xatırladaq ki, Bursanın Osmanqazi bələdiyyəsinin ərazisində salınan general Polad Həşimov Parkının açılışı oktyabrın 28-də geniş ictimaiyyətin iştirakı ilə keçirilib.
Tarix
2020.10.31 / 18:57
|
Müəllif
Axar.az
|