Rusiya mədəniyyət xadimləri ilk növbədə Xocavənd rayonunun malakanlar yaşayan Kurapatkino kəndindəki pravoslav məbədinin işğal edildiyi illərdə ermənilər tərəfindən dağıdılmasına diqqət yetirməli və onunla bağlı narahatlıqlarını bildirməlidirlər.

Bu sözləri Axar.az-a açıqlamasında Qafqaz Tarixi Mərkəzinin direktoru, UNESKO-nun dosenti Rizvan Hüseynov Rusiya mədəniyyət xadimlərinin Qarabağdakı abidələrin taleyindən narahatlıq ifadə edən açıqlamaları haqda danışarkən deyib.

“Kilsənin fasad divarının yalnız bir tərəfi qalıb. O, 90-cı illərdəki döyüş əməliyyatları zamanı deyil, xeyli sonra məhv edilib. Bu da erməni vandallarının hərəkətlərinin məqsədyönlü olduğunu göstərir”, - o bildirib.

R.Hüseynov qeyd edib ki, Şuşa şəhərinin 1992-ci ildə işğalından sonra orada olan rus kilsəsinin erməniləşdirilməsi də Rusiya mədəniyyət xadimlərini maraqlandırmalı və düşündürməlidir.