Rusiyanın Müdafiə və Fövqəladə Hallar nazirliklərinin Azərbaycanın Qarabağ bölgəsində aktiv fəaliyyəti səbəbindən həm bu qurumların rəsmi məlumatları yayılır, həm də onlara istinadla şərhlər və münasibətlər sistemli hal alır.

Axar.az xəbər verir ki, bu məlumat və şərhlər içərisində ciddi narahatlıq yaradan istilahlar da az deyil.

Məsələn, Rusiya FHN az öncə “Dağlıq Qarabağ əhalisinə” yardım göndərildiyini elan edib.

“Dağlıq Qarabağ əhalisi”, “Dağlıq Qarabağın zərərçəkən sakinləri” yoxdur: Azərbaycanın Qarabağda məskunlaşdırılan erməni vətəndaşları var. “Dağlıq Qarabağ” – inzibati ərazi kimi də, bölgə kimi də mövcud deyil. Azərbaycanda iqtisadi zonanın adı Qarabağ və Yuxarı Qarabağdır.

“Dağlıq Qarabağ əhalisi” və yaxud “Dağlıq Qarabağ sakinləri” hansısa formada 1991-ci ildə de-yure ləğv edilən və 10 noyabr 2020-ci ildə Ordumuzun 44 günlük müharibənin nəticəsi olaraq de-fakto silib-süpürdüyü keçmiş qurumu yaşatmaq, olmayan bir şeydən varmış kimi danışmaq və bunu gələcək danışıqların predmetinə çevirmək cəhdidir.

Ekspertlər hesab edirlər ki, Rusiya mediasında bu cür halların yayılmasının qarşısını almaq üçün diplomatik çərçivədə addımlar atmaq, sözügedən media orqanlarının bu təhriflərə yol verməməsinə nail olmaq lazımdır.