“Karabakh Telecom”un Azərbaycan ərazilərində xidmət göstərməsi qeyri-qanunidir.

Bu sözləri Axar.az-a Nəqliyyat, Rabitə və Yüksək Texnologiyalar Nazirliyinin ictimaiyyətlə əlaqələr şöbəsinin müdiri Günel Gözəlova deyib. O bildirib ki, bu məsələ Azərbaycan dövlətinin ciddi nəzarətindədir:

“Nəqliyyat, Rabitə və Yüksək Texnologiyalar Nazirliyi tərəfindən hazırlanan təkliflərdə də bu şirkətin qanunsuz fəaliyyətinin dayandırılması məsələsi var. Azərbaycan öz ərazi bütövlüyünü Vətən müharibəsinin yekun nəticəsi olaraq təmin etdi.

Ümumiyyətlə Azərbaycanın tarixi torpaqları olan Dağlıq Qarabağ ərazisində istənilən formada rabitənin təşkili və istifadəsi Azərbaycan Respublikasının icazəsi ilə həyata keçirilə bilər.

Eyni zamanda bu ərazilərdə rabitənin təşkili Azərbaycanın Milli Nömrələmə Planına uyğun və həmin ərazilər üçün müəyyən edilən kodlar üzərindən təşkil edilməlidir və ediləcək”.

Qeyd edək ki, ötən gün Qarabağ separatçılarının terrorçu rəhbəri Araik Arutyunyan Ermənistanın mobil operator şəbəkələri rəhbərləri ilə görüş keçirərək, onları Qarabağa çağırmış və Qarabağ ərazisi ilə Ermənistanın rabitə şəbəkəsini “birləşdirməyi” təklif etmişdi.