13:33

Azərbaycan Respublikası Prezident Administrasiyasının ictimai-siyasi məsələlər şöbəsinin keçmiş müdiri, Prezidentin ictimai-siyasi məsələlər üzrə sabiq köməkçisi Əli Həsənov Azərbaycana gətirilib.

Axar.az xəbər verir ki, mediada yayılan bu məlumatı dəqiqləşdirmək üçün Bakupost.az Ə.Həsənovun həyat yoldaşı Sona Vəliyeva ilə əlaqə saxlayıb. Ona Ə.Həsənovun müalicədən sonra Azərbaycana qayıdıb-qayıtmamağı ilə bağlı sual verib. S.Vəliyeva sualı dinlədikdən sonra dəstəyi asıb.

***

Prezident Administrasiyasının sabiq şöbə müdiri Əli Həsənov xaricdə tutularaq Bakıya gətirilməsi barədə yazılanları təkzib edib.

“Mən oktyabr ayının 1-dən Bakıdayam, ev şəraitində müalicə olunuram və yaradıcılıq fəaliyyətimi də davam etdirirəm. Məni heç bir iş üzrə, heç bir yerdə də sorğulamayıblar", - Ə.Həsənov bildirib.

Xatırladaq ki, bir müddət əvvəl Əli Həsənov müalicə olunmaq adı ilə Türkiyəyə getmişdi. Mətbuata açıqlamasında 10 gün sonra geri qayıdacağını bildirən Əli Həsənovun bu günə qədər xaricdə yaşadığı güman edilirdi.

Vəzifədən azad olunduqdan sonra Əli Həsənovun korrupsiya əməlləri və qanunsuz biznes fəaliyyətləri haqqında məlumatlar tirajlanmağa başlanmışdı.

Əli Həsənov son günlərdə KİVDF rəhbəri Vüqar Səfərlinin həbsi ilə yenidən gündəmə gəlib. Belə ki, kütləvi informasiya vasitələri üçün dövlət büdcəsindən ayrılan milyonlarla manatın mənimsənilməsində şübhəli bilinən Vüqar Səfərli Əli Həsənovun yaxın adamı idi.